E ta situacion cu pa por lo menos e pueblo ta birando alarmante. Joyriding ta locual cu ta sosodiendo practicamente tur dia riba nos isla. E no ta algo cu a cuminsa desde awe pero sigur pa e ultimo lunanan bou maneho di Minister di Husticia, Rocco Tjon a nota un aumento drastico riba nos isla. Primordialmente n’e autonan di marca Kia modelo Rio, pero despues a sigui pa tur otro marca. E ta un trend riba Tik Tok caminda ta horta e autonan di marca Kia. E bandidonan a descubri un forma con por joyride e auto cu un simpel ‘USB-stick’.
Ta parce cu e ladronnan no ta discrimina. A nota cu ta hortando auto di tur marca. A nota for di Honda CR-V, Hyundai Getz, Toyota Tercel y mucho mas. Ta horta e auto, plunder nan y despues laganan benta den mondi. E ladronnan no ta discrima. Tur hende ta nota cu e situacion aki ta birando alarmante menos e parlamentarionan di MEP.
Recientemente a topa cu Alvin Molina di MEP kende ta alabes e presidente di e comision di husticia den parlamento. Segun Molina, e mes no a tende cu e situacion ta alarmante. E sa si cu e ta un problema na Aruba pero no for di awo, for di tempo cu e tabata altoinspector di polis.
Molina ta kere firmemente cu e team di polis lo ta trahando duro pa resolve e casonan aki. A puntr’e; si e no a nota cu e ta situacion ta birando alarmante riba nos isla, segun e parlamentario di 257 voto, el a lesa berdad cu ta hortando basta auto di marca Kia modelo Rio.
Claro, e ta bira alarmante ora ta horta auto di hende. Molina a keda di check cu su minister di husticia pa wak kico ta su plan. Aunke cu te ainda e no a tende di ningun plan nobo di e minister. Mientrastanto, e minister, esta Rocco Tjon kende t’e mandatario cu menos voto den henter conseho di minsiter ta na Corsou te cu 19 di januari proximo. Tjon a bay atende un reunion caminda lo topa cu e ministernan di husticia di Corsou, St. Maarten y Hulanda. Mientras cu Tjon ta na Corsou, ex-sospechoso y actual Minister Endy Croes ta encarga cu e maneho di Husticia y Asuntonan Social riba nos isla. —
