“Bo no por come klinkers”, “cu klinkers bo NO por haci deporte”, “klinkers don’t pay my bill” ta expresionnan cu nos a scucha masha hopi mes na aña 2013 di partido MEP. Sigur for di Evelyn Wever-Croes y Glenbert Croes, e tempo ey nan tabata den oposicion y tabata contra tur e proyectonan di e gobierno AVP kende tabata renobando e barionan, careteranan, luz pa caya, scol y mas.
E tempo ey, MEP tabata CONTRA tur e proyectonan y tabata cuestiona uzo di klinkers pa cu embeyecimento. A bay campaña electoral bisando e pueblo cu bo no por come klinkers y cu asina MEP drenta gobierno lo percura p’e placa yega bek n’e pueblo y no na klinkers.
Ta masha straño mirando cu a nota un cambio drastico den nan comportacion y palabranan. Minister di Asuntonan Economico, mr. Geoffrey Wever ta ehecutando diferente proyecto cu ta encera uzo di klinkers. Por ehempel renobacion di Wilhelminastraat, ya a termina cu fase 1 y ta completamente bunita y renoba y claro a uza klinkers. Ora mira Plaza Comercio, a keda bunita y claro a haci uzo di klinkers. Aunke segun oposicion, e proyecto ey ta renobacion di un parkeerplaats y no un plasa. Awo e minister ta bezig cu proyecto na San Nicolas, caminda cu tambe ta encera embeyecemento cu klinkers.
A puntra Minister Geoffrey Wever di RAIZ, con su coleganan ta den conseho di minister cu ne, specificamente e ministernan di MEP. Paso t’e mesun ministernan cu antes tabata contra klinkers. Segun Minister Geoffrey Wever, tur proyecto cu e ta ehecutando ta carga aprobacion di henter conseho di minister y cu no tin ningun obhecion. Pues, tur minister, hasta esunnan di MEP ta pro e uzo di klinkers. Cu esaki por confirma cu MEP a bolter y a cambia di pensamento. Pasobra antes ora tabata den oposicion tabata CONTRA y awo diripiente ta keto y hasta ta aproba proyecto cu uzo di klinkers.
