Manera custuma, semper den ultimo siman di november of cuminsament’i december containernan di klapchi ta yega Aruba. Aunke aña pasa e containernan a yega den ultimo siman di December y esey a afecta e benta den gran forma.
Diaranson alrededor di 1:30PM polis motorisa a escolta seis truck cu container di klapchi for di waf na Barcadera pa Wela. Brandweer y DOW tambe a forma parti di e caravana aki. Den combersacion cu Rubin Ponson di comision vuurwerk a conta cu e aña aki a yega menos container compara cu antes. Den e ultimo añanan tabata yega diesocho, binti te cu bintidos container, mientras cu e aña aki a yega solamente seis container.
Locual ta remarcabel ta cu e benta di aña pasa no a bay bon. A resta seis container completamente yen cu klapchi, pues cu esnan di e aña aki ta suma un total di diesdos container.
Ponson a enfatisa cu e interes pa importa y cumpra klapchi, pocopoco ta birando menos. Esaki ta sinomino cu menos punta di benta e fin di aña aki. Pa locual ta trata control, lo keda mesun cos cu añanan anterior. Por spera cu e task force consisti di polis, DOW, DTI, DVG por bati na porta y controla e establecimento.
