Recientemente tabatin un accion di protesta na NV Elmar den oranan di mainta, relaciona cu un situacion di recorte salarial. Rib’esaki Anselmo Pontilius, mediador di gobierno ta conta di e negociacionnan cu ta andando pa asina trece paz laboral na e compania di utilidad aki.
E ta comenta cu mester a reuni fo’i siman pasa, pero a pospone pa e siman aki. Tabatin reunion cu gerencia di Elmar. Tambe cu dirigentenan di Utilities NV, unda cu a discuti riba varios alternativa.
Diahuebs a atende cu STA y awe a atende cu e otro dos sindicato pa mira con e partidonan por haya otro den un acuerdo por lo menos aworaki a corto plaso.
Lo continua awemerdia cu gerencia y STA na mesa y a pone fecha si ta necesario tambe pa otro siman, cu tur partido pa mira si por yega na un acuerdo riba un punto cu nan tin varios luna entre nan mes ta discuti si nan por sali fo’i dje.
Tin proposicion aworaki riba mesa. E partidonan tin cu purba di haya otro den e proposicionnan cu mediador a pone riba mesa. Ta bay mira con por ahusta esakinan den e proximo oranan. Pero e pensamento ta cu pa mas tarda fin di otro siman, por tin un acuerdo rib’esaki.
Segun Pontilius, den e caso di Elmar tur trahado ta entregando 5% di nan salario y gran parti di nan bonus di fin di aña. E ta totalisa e 12.6%. Loke ta tratando ta pa mira e contracto colectivo otro aña. Si ta posibel con pa atende cu esey di biaha, pero na mesun momento con ta atende cu e situacion cu a surgi desde januari di e aña aki.
Pa e parti aki tin proposicion riba mesa. Den e proximo dianan ta spera di keda cla cu e parti aki. Sea cu ta keda cla pa e parti aki pa 2021, pero na e mesun momento a acepta tambe kico ta bay haci pa loke ta contracto colectivo den 2022.
Esey ta e puntonan cu mediador a redacta. E partidonan por adapta, mehora, pero mester por yega n’un acuerdo. A palabra esey cu tur partido, pa purba di cera un acuerdo pa mas tarda fin di otro siman.
Den negociacion sa cu no ta haya tur cos. Mester ta hopi realistico den e parti aki. No mester wak awe, sino e proximo añanan cu ta bin. Cualkier empresa, manera Elmar den e caso aki, no ta solamente e parti directo financiero, sino e totalidad di beneficio secundario y garantia di cupo di trabao.
Pa awe tardi, mediador lo tin un reunion cu STA y gerencia di Elmar pa 2:00 pm basa riba loke a palabra ayera pa asina purba di acelera y keda cla.
