Den tres famia e muchanan a caba nan scol y awo nan ta den situacion unda cu EPB Hato no a laga nan inscribi. Esaki a trece hopi preocupacion p’e mayornan. E muchanan a termina Scol Basico Dornasol y nan a bay haci test pa mira cua scol nan ta sigui. Tres di e muchanan a haya e conseho pa bay EPB, pero e scol aki a nenga di acepta nan na momento di inscripcion. Tampoco ta duna nan un contesta di e motibo. E mayornan ta pidi minister di enseñansa pa yuda nan.
Arlinda Marin, mama preocupa, a splica cu su yiu a haci e test den 6de klas y aki a bis’e cu e mucha ta sigui pa EPB. Sinembargo, un pa dos dia despues di graduacion, nan a haya whatsapp di scol bisando nan cu tin dificultad pa acepta e muchanan na EPB. Nan mester bay cana un caminda pa mira kico por haci p’e muchanan haya scol.
Diferente carta a bay pa diferente instancia, pero no ta haya un contesta. Incluso Marin a tuma contacto cu Inspectie Onderwijs y a papia cu e director. El a splica e situacion unda cu su yiu a caba scol basico, ta haya conseho pa EPB, pero no ta acept’e. E mama kier sa e motibo cu nan no ta acepta e mucha. E ta sinti cu esaki ta un discriminacion contra e scol, discriminacion p’e yiunan.
DERECHO DI MUCHA
E yiunan a haya guia special, y segun Marin, e no por keha dje scol. E maestro- y leidsternan di Dornasol a yuda nan bon. E mayornan ta asina contento cu e muchanan a haal e, pero awo ta corta nan hala. E kier sa unda tur derecho dje mucha a keda? Unda e leerplicht a keda? Unda tur hende cu mester yuda nan pa e muchanan haya scol a keda? Scol ta bay habri y no tin scol pa nan.
E ta puntra si e muchanan mester keda tira riba caya, pasobra no tin un contesta pa nan.
Marin a splica cu a bisa e otro dos mayornan cu a presenta pa inscribi nan yiunan a haya un no. A bisa nan pa warda y lo tuma contacto, pero nada di esey a pasa. E no sa kico pa haci y e ta kere cu minister so por yuda nan.
Gloria Estrada ta un wela preocupa y el a conta cu na momento su yiu a bay inscribi e nieto, nan a bis’e cu no. Segun EPB a bisa, ta cu nan no tin convenio cu Dornasol p’e muchanan di e scol aki pa ricibi nan. Esey a pone cu nan a presenta na DPS y a yena formulario, a papia cu e director, kende a bisa di bay papia cu EPB y te awo nan ta wardando contesta. Tur e dianan aki nan a presenta n’e departamento, pero a haya sa cu e ta di vakantie. E secretaria a yama minister riba e situacion aki, unda tabata haci un reunion riba e asunto aki. Aki e secretaria di DPS a informa nan cu esaki ta un problema dje director di EPB cu no kier ricibi e muchanan.
E mayornan aki hunto cu e wela kier sa e pakico ta nenga e muchanan. Nan ta pidiendo minister pa yuda nan cu e situacion aki y cu e director di EPB pone man na curason ya cu ta trata di seis mucha. Incluso e wela a presenta na SPO pa wak si ta haya luga, pero di mira e carta a bisa nan cu no, pasobra EPB mester ricibi e mucha. E mucha tabata falta un punto pa bay MAVO.
Pa mas lesa TREMPAN.COM.
