Politicamente ta papia di un crisis cu lo tin den coalicion consistiendo di partidonan MEP y Raiz. Esaki basa riba e hecho cu Gobierno, di cual MEP ta e partido mas grandi, a dicidi di bay Casacion contra e decision di matrimonio di mesun sexo. Un decision di Corte cu Raiz ta apoya. Inclusive ta co-firmante di un concepto di ley cu mester bay Parlamento den algun luna.
A combersa cu lider di fraccion di MAS drs. Marisol Lopez Tromp, a bisa cu e ta mira cu tin hopi cosnan importante cu mester tin atencion di Gobernantenan. Loke nan ta sinti ta cu tin hopi topico cu merece atencion urgente. Y e ta referi no solamente na e situacion financiero di Aruba, pero tambe loke gobernantenan ta haci pa presenta ley na Parlamento unda cu ta absolve nan responsabilidad politico y evita cu nan ta wordo investiga y persigui. Y tambe leynan cu nan kier pa wordo aproba cu forsa retroactivo pa di e forma aki core pa nan responsabilidad. Tambe el a menciona e ley unda cu kier exonera un exminister pa decision cu el a tuma contra interes di pais Aruba.
A base di tur e puntonan aki e ta kere cu e por conclui cu Gobierno ta den un crisis. Loke ta mira awo ta un discusion continuo riba un topico unda cu tur hende sa cu Raiz y MEP no ta riba e mesun punto di salida. Un ta bay drechi y e otro ta bay banda robes. Esaki mientras cu den Conseho di Minister un di e partinan di gran importancia ta cu mester tin un maneho. Esaki ta nifica cu nan mester ta riba un solo linea. Tres aña pasa e Gobierno aki a manda un carta Parlamento bisando nan cu su persona mester bay cas pasobra no tin unidad den maneho riba un topico cu Gobierno ta considera importante. A base di esaki a dun’e su retiro. P’esey den e situacion actual e no por conclui otro cu mester tin retiro di minister tumando luga. Raiz den un conferencia di prensa ta bisa cu nan no por exigi pa loke nan ta para p’e. “Nan no ta di acuerdo y ta tira e asunto den scochi di Parlamento. Fo’i ki dia Minister ta determina agenda di Parlamento. For di ki tempo un Minister ta determina ki tempo un ley ta wordo trata eyden sin cu e presidente a yama e reunion aki. Cu mi sa tin diferente ley importante den tapara pa wordo trata. Entre otro e ley di medio y naturalesa, leynan riba areanan financiero y social, leynan cu tin di haber cu economia, pa stimula esaki. Por menciona hopi ley. Loke ta mira awo aparentemente Parlamento mester bay resolve puntonan di conflicto cu tin den Conseho di Minister. Tur esnan cu a firma e acuerdo di Gobernacion, mester mantene nan mes na e puntonan aki, cual sea cu e ta.”
Loke el a señala ta cu di banda di MEP ta keto pasobra e no a scucha Prome Minister bini dilanti den rueda di prensa pa splica kico ta pasando den Conseho di Minister.
