E fiesta patronal di San Juan Pablo II ta tuma luga diasabra. Algun parokia ta celebra e dia special aki p’e parokianonan mañan mes. Parokia di Tanki Leendert ta celebr’e diadomingo mainta cu e hobennan. Pa honra e momento aki a traha un poema na honor di Juan Pablo II, kende ta e Patrono di Hornada Mundial di Hubentud.
Poema:
Di mucha Karol a sufri masha hopi mes
ora prome cu el a haci nuebe aña
su mama stima a bay lag’e.
Y su ruman homber Mundek,
e dokter hoben, despues tambe a fayece.
Di hoben un gran deportista e tabata
den su estudio el a profundisa
y diferente idioma el a sa di domina.
Ta na Dios el a dedica su mes,
a skirbi poema y hunga rolnan teatral.
Di adulto Karol tabata un ser agradabel,
hopi activo y c’un forsa religioso asombroso.
El a sa di biba den un pobresa grandi,
a pasa den miedo teribel ora cu casi 21
a yega cas fe trabou y su tata ya a bay sosega.
Como Polaco den un pais totalitario
oprimi cu no conoce democracia,
scondi el a bay seminario clandestino.
Ay si e Alemannan a gar’e, morto sigur
e lo tabata den un campo di concentracion.
Como Santo el a wordo proclama,
rond mundo su milagernan a bira conoci
y un gran amor pa hobennan e tabatin
Santo stima, Aruba tambe ta honra B’awe
c’un Caya na Dakota y na T.L. … un Parokia
Como pueblo, nos lo recorda Bo semper
Ora nos pasa dilant’i nos Pro-Catedral
y admira e busto magestral dje escultor Abath
Y rondo di dje, e plenchi di e misa
c’a hay’e nomber di “Plaza San Juan Pablo II.”
Totus Tuus, Maria!
