Lider di fraccion di AVP, Marlon Sneek tin un preocupacion. E ta sinti cu minister Xiomara Ruiz-Maduro a tuma pueblo haci kens cu e prijs di gasolin.
El a splica cu ta di lamenta sigur, ora cu scucha e entrevista cu minister a duna ayera, caminda cu minister kier bay hunga cu inteligencia di pueblo, bisando pueblo cu no ta berdad, cu prijs di gasolin no lo bay subi.
Loke e no a bisa pueblo ta, cu berdad e no ta bay subi, pero e no ta bay baha tampoco. El a scoge, manera cu por mira e publicacion, caminda cu ta haya for di, den e caso aki, departamento di asuntonan economico, pa ora cu prijs mester a baha cu 3.3 cen, el a bahe cu 1.8 cen so. El a keda cu 1.5 cen di pueblo.
Mescos cu na comienso el a haci’e, kita 2 cen. No mester lubida cu e meta local ta 10 cen nan kier kita for di bo. Nan a kita dos caba mas of menos seis luna pasa. Awo nan a kita 1.5 mas for di bo.
Esaki ta e abuso cu ta tuma luga. Awe kier bin papia cu gobierno a duna aden for di 2017. Mas di 10 aña pasa, por a mira e gabinete Mike Eman I y II a bisa cu e tempo di 2007 a entrega y mester duna bek? No. Awe bo kier bin basa bo mes riba un cos di 10 pa 11 aña pasa, pa malogra e pueblo aki.
Experto di nan a bisa no ta berdad, cu no tabata tin efecto. E efectonan ey ta keda. Sigur ora cu mira cu riba gasolin tin dos schakkel di BBO, ta 6 porciento e gasolin a subi mas halto. Banda di dje, cada bes minister cu haya un chens, na luga pueblo haya un alivio, caminda cu 3.3 cen ta baha, ta keda cu 1.5 cen, bisando pueblo cu no mester worry, y cu no ta berdad gasolin ta bira mas caro, hungando asina un biaha mas cu inteligencia di pueblo.
Un hende cu sa miho cu esaki, un minister, ta purba di convence pueblo cu e 1.5 cen cu e ta bay kita for di nan, cu no ta e. E cos aki sigur pa fraccion di AVP, ta cosnan cu ta keda trece dilanti.
Horeanan ta habri, wowonan ta habri y lo keda informa pueblo cada bes, ora tipo di cosnan di sinberguensa ta tuma luga y no ta honesta cu pueblo.
Tambe den e mesun entrevista e mandatario a bisa cu lo mester haci un investigacion pasobra un carta a liek, el a yega caminda e no mester yega.
Esaki ta e gobierno cu a bisa cu nan ta transparente, cu lo bay tin bon gobernacion, cu no tin nada di sconde.
Awor e kier investiga ta con bin e carta a sali. Si no tin nada di sconde, bisa pueblo e berdad. Cu lo bay kita 1.5 cen riba cada liter, anto sea honest. Pakico mester sconde.
Ta e website di gobierno ta esun cu a publike esta masnoticia.com. Ta un wega entre nan cu nan y tumando pueblo haci.
