Tur hende conoce e situacion dilanti di CITGO Palm Beach y Palma Real ora cu awa yobe, unda awa ta keda para y stroba trafico move. P’esey pa algun siman e pasada dilanti di Citgo lo ta cera p’e trabounan cu DOW ta bay haci di drenahe. Ta haci esey pa tene e caminda accesibel bou circunstancia mas miho.
ir. Marlon Croes, director di DOW, a indica cu e trabou aki ta bay encera diferente fase. E prome fase ta mehora e fluho di trafico dilanti CITGO. Nan ta bay renoba e caminda di asfalt desde CITGO te cu Botica Sta Anna. Ta parti fase 1 den tres segmento.
E prome segmento ta cobamento pa asina pone tuberia, bashamento di cement y conecta e drenahe nobo riba e bakprofiel cu tin bou Palma Real. E di dos segmento ta frees (kita) e capa di asfalt fo’i CITGO caminda te cu Botica Sta Anna. E caminda lo ta parcialmente cera pa tur trafico for di 11:00pm pa 7:00 am pa 4 dia di trabou, durante dia caminda ta habri pa trafico.
Seccion 3 ta asfalta e caminda for di CITGO te cu Botica Sta Anna. E caminda lo ta completamente cera pa tur trafico desde 9:00 pm te 12:00 pm pa un dia di trabou. E caminda ta habri bek pa 12:00 pm.
Fase 2 ta amplia e capacidad di awa y structura e muraya di e duiker na e crusada di e tanki na Palm Beach. Fase 3 ta amplia e capacidad di awa na e duiker di Keito, mientras fase 4 ta asfalta y mehora e fluho di awa na e caminda di tera na haltura di Palm Beach 94B.
Pa mas lesa TREMPAN.COM.
