“Yuda otro, pero tambe percura pa otro. Tabata un honor pa ta bo prome-minister. Danki, danki, danki,” Mark Rutte a finalisa su discurso diadomingo atardi (ora di Hulanda) directamente for di “Het Torentje”.
Nunca antes un premier saliente di Hulanda a tene un discurso di despedida y tampoco for di “Het Torentje”. El a haci esaki cu hopi nostalgia. No ta por nada. Rutte ta despedi despues di a sinta mas cu un decada como e politico di funcion mas halto di Hulanda.
“Tabatin algun dia gris pero tambe mi a haya mas lachi desde e prome dianan como prome-minister. E no por ta otro tampoco despues di diescuater aña den e trabou aki. Tempo ta bay lihe, hopi cos a pasa. Algun dia mas y mi tempo como premier a finalisa. Mi no ta sinti cu esey ta real y mi ta sinti un poco di tristesa. Di cerca mi a biba e cosnan di mas bunita, pero tambe sucesonan tristo y dificil. Mirando atras, mi ta hopi gradici pa un tempo special y intenso,” Rutte a cuminsa su discurso bisando.
Ora cu scucha su discurso completo no por a nenga e tristesa cu e tabata sinti pero tambe cu e ta gradicido y orguyoso di e temporada aki. Y e palabranan na final di e discurso a demostra esaki.
Aunke e no a papia di e islanan specifico, pero si a dedica un parti na momento cu el a bisa cu un di e momentonan mas importante durante su periodo como prome minister ta ora cu el a pidi disculpa pa e pasado di sclavitud.
El a repasa temanan cu a sobresali manera e crisisnan grandi durante su periodo y e temanan cu ainda no a yega na un solucion. “Como prome minister bo ta den un situacion di privilegio cu bo ta haya e oportunidad di nifica algo pa e pueblo, haci algo bon. Mi ta spera cu mi a logra esaki de bes en cuando. Pero tambe mi a siña algun cos, manera por ehempel haci bo esfuerso y haci cos bon ta dos diferente cos. Den caso asina mi pensamento mesora ta bay riba temblor na Groningen y e asunto di “toeslagen”. Mi ta tuma esey personalmente. Como premier, no ta busca bo solamente pa lamenta e sucesonan. Si cosnan no a bay bon, mester busca solucion. Nos ta tratando, pero ta sumamente frustante cu e cosnan no ta sosode mas lihe. Na e habitantenan di Groningen y e mayornan beneficia mi ta bisa: Mi ta desea cu boso problema- y preocupacionnan disparce mas lihe posibel pa boso por sigui dilanti.”
Pero tambe el a corda e crisis economico di 2012 pa 2013 y e atentado riba MH17, dies aña pasa. A menciona cu el a sosode basta tempo pasa pero e imagennan ta cla cla den mente di e Hulandesnan. “No por lubida e imagen tristo di yegada di e curpanan na Eindhoven, e fila largo di shersh sigui pa miles di persona riba e ruta y despues e conmemoracion nacional. Pa mi personalmente MH17 ta kisas ta e suceso mas intenso y emocional di henter mi mandato como prome minister. Tambe el a cambia mi vision personal di mundo. Mi a siña con importante pa como pais no ta bo so para den momento di crisis y menasanan. Hunto nos ta mas fuerte cu nos so. E pensamento ey mester motiva nos pa sigui apoya Ucrania. Pa paz eynan y nos siguridad aki na Hulanda.”
Disculpa pa sclavitud
E momento cu mas a impacta e politico den su posicion como prome minister, ademas di e dosnan ya menciona, tabata momento cu el a pidi disculpa pa e pasado di sclavitud, “cu tur e emocionnan cu esaki a causa”. Y a agrega cu “esey ta momentonan unda cu den e posicion di prome minister por pone un conexion directo door di reconoce loke cu a pasa. Tur e emocionnan cu esaki ta los. No como persona, no como Mark Rutte di Den Haag, pero como representante di algo mas grandi, Di un pais y di un comunidad. Esaki, for di mi boca, ta zona kisas formal. Pero den realidad mi a sinti y biba e momento. E ta un orguyo cu mi por a tuma e rol ey na algun ocasion.”
Diamars e Gabinete nobo ta huramenta, e ora e reemplasante di Rutte ta bira Dick Schoof. Y Rutte ta bay ocupa e posicion mas halto den OTAN (Organisacion di Tratado Atlantico Nort). E ta un aliansa militar internacional, firma dia 4 di april, 1949, funda door di 16 pais y lidera pa Merca, Francia, Reino Uni y Italia.
