Lider di fraccion MAS drs. Marisol Tromp cu actualmente ta presente na Hulanda pa e conferencia di IPKO, a papia cu 24ora.com tocante e caso di entradanan hudicial na Cas di gobernacion di Aruba (Cocolishi), y encuanto un video cu e parlamentario a expone siman pasa, cu ta cuestiona e mandatario di Gabinete Wever-Croes II , di cual a haci investigacion na su ministerio diamars.
Awor tin un situacion cu Cocolishi (bestuurskantoor) a haya “inval”, segun e politico veterano ta señala: “Imaginabo. E cas di integridad, e cas di gobernacion di premiere Evelyn Wever-Croes, y esaki no ta e prome biaha.” Ta mustra cu no ta prome biaha cu a haci un “inval” den cas di gobernacion, den pasado a tuma luga un “inval” na Bestuurskantoor na aña 2020 relaciona cu e caso “Flamingo” y awor esaki ta di dos biaha.
Tromp ta agrega cu den Cocolishi por haci un inval y na cualkier caminda esey ta nifica ta nifica cu e parti hudicial ta drenta sea ta busca hende pa detene pa a comete cosnan cu ta haci nan sospechoso, of cu nan lo ta buscando informacion pa confisca, of aparatonan, of cosnan cu surgi como prueba den e caso aki.
E politico ta mustra cu ningun di dos caso ta positivo pa gobierno. E puntra of recorda frase cu e mandatario aki a yega di bisa, esta cu e no ta laga e director ‘handle’ y firma, e mes ta firma, y a sigui recorda mustrando con e mandatario a kita e “tekenbevoegdheid” (autoridad di firma) di directora di DIMAS durante e temporada en cuestion.
“Loke si sa cu pa loke ta toca su maneho, esey ta loke nos como miembro di Parlamento ta controla su ministerio.” Minister Croes como mandatario ta bisa cu e no ta sospechoso y no tin nada di haber cu e caso riba titulo personal. Pero, “con e ta splica e ora, cu esaki no tin nada di haber cu bo persona, con por duna pueblo un splicacion, na momento cu ta haci “inval” y drenta edificionan y cas di Libertador Betico Croes (den feliz memoria) cu ta tata di Minister Glenbert Croes. Ademas a haci “inval” riba oficinanan y edificionan di ruman.”
E parlamentario ta cuestiona: “Con ta splica e ora, cu esaki no tin nada di haber cu bo persona, con por duna pueblo un splicacion ? Sali y bin pafo di “e conference room” caminda miembronan di prensa no tawata t’ey ora bo a papia. Bin splica pafo y laga nos haci bo pregunta den parlamento kico loke exactamente ta pasando.”
Tromp ta mustra di no por kere den e caso aki cu Minister President ta permiti tur esaki, den e añanan cu a pasa pa aspectonan cu ta mustra menos grandi esaki, cu tambe ta grave a baha un gobierno. “Awe nos ta wak cu practicamente Minister President a drenta na oficina di Gobernador y sali pafo mudo, no kier a duna declaracion.”
E politico ta sigui agrega mustrando: “Por wak Minister Ursell Arends encarga cu e cartera di Integridad tambe ta mudo, e mandatario ‘a post algun par di cos riba Facebook’. Kier sa kico e mandatario ta pensa den su funcion como minister di integridad, cu tampoco no a declara nada, pa algo asina grave.
E lider di fraccion ta enfatisa: “Corda bon, bo ta haya ‘inval’ pa loke ta sitionan cu ta toca un ministerio di un minister actual di bo gabinete. Na opinion di e fraccion, masha dia mester a retira nan confianza na Minister Croes.”
MOCION DESCONFIANSA
Tromp ta mustra cu pa dos aña caba tawata pidi un reunion publico cu Minister Glenbert Croes, riba proceder na e departamento di DIMAS, retiro di e directora di e departamento encarga cu maneho di stranheria, proceduranan di e departamento cu ta cay bao di maneho di e politico. E parlamentario a agrega indicando cu e mandatario no ta tene cuenta cu consehonan cu ta haya, ta cambia nan. “Ineficiencia”, “instransparencia” ta e forma con e por describi e maneho.
Durante e reunion publico cu tawata riba e fecha di 16 di april ultimo, Fraccion di MAS a presenta un mocion di desconfianza contra Minister Croes y a splica e motibo tras di e mocion di desconfianza.
Despues di e reunion publico a haya 12 parlamentario cu a bay contra e mocion di desconfianza pa cu Minister Croes. Tin ocho parlamentario cu si a sostene e mocion. Esencia ta, segun e parlamentario, cu no tin confianza den su maneho, pa e motibo cu ta wak den su ministerio y departamentonan tin un “free for all” (tur hende ta haci kico nan kier) , tin proceduranan cu ta “manca”, e ta firma cosnan cu ta negativo y ta cambia nan pa positivo, segun Tromp ta señala.
E parlamentario ta testigua cu “ a haya documentonan den man, caminda e minister ta priminti cu grupo di persona den exterior pa bin traha na Aruba, entre otro: na hotelnan cu ta bisa cu tin necesidad”. Segun e politico ta sigui mustra: “Loke e minister ta priminti e personanan den e cartanan aki, absolutamente ‘no ta frasenan di bon gobernacion’, e ta compromete cosnan cu e no por ni sa di antemano cu e departamentonan ta bay di acuerdo cu nan.”
Ta p’esey Tromp ta bisa cu e ta keda cuestiona y puntra y tambe a bin cu e mocion di desconfianza. E lider di fraccion a expresa cu “tempo lo mustra y nos ta kere den esaki cu lo haya rason, ta imposibel pa esaki por keda continua”.
