Dialuna Parlamento di Aruba a trata presupuesto supletorio. E ministernan tabata presenta pa asina scucha tur e preguntanan di e parlamentarionan. Lider di Fraccion MAS a dirigi su mes riba RWZI y tabata desea di haya informacion kico tur ta haciendo pa drecha e problema aki. Tambe e tabata interesa pa haya informacion riba e social crisis plan como BBO na frontera.
drs. Marisol Tromp, parlamentario (MAS), a indica cu durante e reunion su persona a haci diferente pregunta n’e ministernan presente. Un di su preguntanan tabata riba RWZI, cu ta conoci p’e awa sushi cu tin n’e area di Bubali. Hopi bes e awa aki ta bay lama. Echo ta cu e luga aki a yega su maximo capacidad. E parlamentario a pidi p’e minister encarga splica kico e plan cu ta bay ehecuta.
Ta scucha varios cos, ta splica varios cos. Pero, kico ta e situacion awo. Pa loke ta trata e topico aki, e mandatario a splica kico nan ta haciendo. Tromp a puntra riba e echo cu dicon pueblo so ta aporta, dicon e hotelnan no ta haci esey. Gran parti e cosnan ta sali fo’i e hotelnan, esta no solamente e parti di desperdicio sanitario, pero tambe e vet y tur uzo di likido di e hotel. El a sigui splica cu tur esey ta algo cu ta sosode pa hopi aña caba.
Pueblo ta paga belasting. A puntra e mandatario riba su opinion di esaki, kende na su turno a indica cu nan ta preparando pa cobra e turistanan. Incluso e mandatario a bisa binti dollar pa cada turista. E parlamentario ta kere e forma con e minister a splica esey ta cubri e hotelnan, pero tambe otro acomodacion. Riba esey e mandatario tabata breve.
Tromp ta di opinion cu mester pone mas pregunta riba dje, pasobra tin parti cu no ta e turistanan so. Tin otro parti cu tur acomodacion y hotel den area tin efecto riba RWZI, di cual ta grandi.
Social crisis plan
Un otro topico cu Tromp a trece dilanti tabata e social crisis plan. Na aña 97 a bin cu un plan di crisis, unda a hinca miyones den esaki. E ta calcula cu esaki tabata rond di trinta miyon of ta mas. El a puntra minister Rocco Tjon pa splica con a gasta e suma aki. Tjon a splica parlamento cu tin algun rapport cu ta indica ken nan tur a haya placa, esta cua fundacion y departamento.
E parlamentario su pregunta no ta ken a haya, pero e kier sa con a gasta e placa. Tambe si nan por hustifica na final y duna di conoce unda e placa a bay. Sinembargo, bisa con a uza e placa.
BBO na frontera
Apart di haci pregunta riba RWZI y social crisis plan, e parlamentario a bay riba BBO na frontera. Den e ley, Tromp a lesa cu nuebe miyon mester drenta. P’esey el a puntra e ministernan riba esey, mirando cu e ley a pasa den parlamento. MAS a vota contra, pasobra nan ta di pensamento cu BTW mester ta introduci y no BBO na frontera.
E parlamentarionan di coalicion a vota voor y gobierno ta sostene esaki. El a puntra e ministernan riba con nan a experencia e proceduranan di BBO na frontera. Tambe con nan mes como minister, como persona, ora drenta Aruba, a experencia paga BBO na frontera. Tromp kier a haya un contesta riba e parti ey.
