Pa Lider di fraccion MAS, Parlamentario Marisol Tromp e esencia di henter e reunion encuanto e finansa di Aruba ta cu e Departamento di Finansa no tin un maneho specifico pa cumpli cu e Rijkswet. Un Rijkswet cu Aruba tin añas caba ta warda riba dje pa e wordo aproba y asina porfin cumpli cu loke a palabra. E meta pa mehora e maneho financiero no a wordp realisa. Esaki ta loke a bin afo di un investigacion cu Ministerio di Binnenlandse Zaken y Koninkrijksrelaties (BZK) a laga haci. Consecuencia di e maneho deficiente di minister Maduro
ta cu Aruba ta keda financieramente suak.
Informacion pa responsabilisa y ehecuta ta drenta frecuentemente mucho laat, Aruba ta cana atras cu cinco (5) relato anual (Jaarrekeningen). E esfuersonan haci pa minister Maduro no tawata eficaz. Cu otro palabra, no a realisa e esfuersonan haci pa mehora e maneho financiero di Aruba debidamente y manera palabra den e protocolnan firma. Di otro banda prome minister ta keda pospone tur cos y awo e recuperacion di dicho retraso a keda posponi te otro aña cu e posibilidad cu ningun di e cuentanan anual den su periodo di gobernacion lo wordo trata mas bou di e gobierno actual. E pregunta ta si nos Departamento di Finansa ta capas pa carga e cambionan cu Aruba a acorda cu Hulanda ful manera mester ta.
Pa e motibo aki Parlamentario Tromp a haci e preguntanan dirigi na minister di finansa mr. Xiomara Maduro.
- El a bisa di lo bay capacita y recapacita personal pa e.o. departamento di finansa ya cu esaki ta un departamento hopi importante pa por cumpli cu tur e otro departamentonan cu ta resorta bou di otro ministernan. E realidad ta cu no tin mucho cos a sosode te cu awor.
- Minister Maduro a bisa cu e lo bay reenforza CAD (Centrale
Accountantsdienst) cu a haya nan mes druk cu cantidad di investigacion riba diferente minister di e gobierno actual y por mira cu minister Maduro no ta recapacitando CAD tampoco manera mester ta.
- Tambe ex secretario di estado Alexandra Van Huffelen a manda un carta pa Tweede Kamer cu Aruba falta eficiencia y no ta eficaz. Palabranan duro di e secretario di estado despues cu por a mir’e hunto cu minister Maduro y prome minister Wever-Croes na diferente ocasion, hunto y amical, bistiendo shimisnan bunita y colorido, bisando cu tur cos ta na ordo durante yen di borrel, receptie y biahamento. Pero concretamente nada a wordo haci te cu awor aki. Minister president ta keda pospone e reunionnan y minister di finansa no por cumpli ni cu parlamento! E pregunta ta keda: Unda e cinco (5) cuentanan anual (jaarrekeningnan) ta pa asina parlamento por cumpli cu su trabou? Minister di finansa ta yen di promesa bashi y tur e jaarrekeningen desde aña 2019 ainda no ta cla.
Parlamento ta wardando mas cu mei aña riba jaarrekening 2019 cual minister Maduro hunto cu e director di finansa a entrega na Algemene Rekenkamer na november di aña pasa caba. Jaarrekening 2019 en esencia ta cuater (4) aña laat! Minister Maduro ta blo priminti cu e lo yega parlamento pero nada ainda. Esakinan ta documentonan cu parlamento mester pa por haci nan trabou di control di pais Aruba segun ley.
E presupuesto supletorio ta yen di kronkels pa bruha e ciudadano. E presupuesto ta yen di gesjoemel cu cifra y gobierno ta haci como sifuera e ta pa coregi y ta core pone par di cos positivo aki aya pa pueblo, ya pueblo ta kere cu ta un presupuesto positivo. Hopi placa ta wordo gasta na casonan den corte y mester bisa cu e aña tras di lomba a kibra record di tanto director cu a wordo hala, terecht of onterecht. Ta poniendo managementteams tur caminda, un bay bin di halamento di hende. Tambe ta gasta hopi placa na cierto destahonan publico unda cu e trabounan ta malo compara cu e suma cu nan a costa. Echo ta cu Hulanda a constata cu e maneho financiero di gobierno ta suak.
Ya pa basta siman pasa caba Parlamentario Tromp a manda diferente pregunta por escrito pa e mandatario di finansa y asina mes e mandatario no a conesta tur preguntanan drechi. Di tur loke minister Maduro a contesta, e esencia ta cu e minister di finansa di Aruba su maneho financiero ta deficiente y e no por duna cuenta ki tempo tur e jaarrekeningen atras lo ta keda cla ni por duna un timeline ki tempo e por fortifica su departamentonan. Parlamentario Tromp a constata cu riba e preguntanan over di tardansa y con pa minimalisa esaki, e contesta di minister Maduro ta laga hopi di desea. E minister di finansa ta yen di excusa pakico e no por cumpli y no ta bin cu solucionnan concreto.
E minister di finansa kier controla kico parlamentarionan ta haci pregunta riba dje y a bisa Parlamentario Tromp cu pakico e ta haci pregunta over finansa y cu ta riba cosnan social so e mester haci pregunta. Parlamentario Tromp ta haya esaki ridiculo mirando cu e tin un trayecto di casi 27 aña caba unda cu el a fungi tanto como minister como parlamentario y pues por puntra loke e kier na e ministernan. E contestanan cu parlamentario Tromp a haya di Minister Maduro riba e preguntanan por escrito ta simplemente confirma loke Hulanda a constata caba: Maneho descabeya, falta di eficacia y eficiencia pa loke ta e maneho financiero di pais Aruba pa ehecuta plannan traha. Maduro ta lubida cu parlamento ta su hefe y tin tur derecho pa cuestion’e y pidi clarificacion riba su maneho. Pueblo mester corda cu un jaarrekening ta e responsabilisacion riba e presupuesto y ora e ta cla e por demostra si tin integridad y transparencia. Awor aki nos ta keda colga na mita! E ciclo presupuestario actual di minister Maduro no ta un ciclo. El a keda na mita.
Mientras Mnister Maduro ta cuestiona parlamentario Tromp cu e lo ta un 0,0. E parlamentario a record’e cu ta e como minister di finansa a score 0,0 na Hulanda den e rapport y carta cu Van Huffelen a manda pa Tweede Kamer.
