Diahuebs tabatin e culminacion di e diferente reunionnan na Surnam den cuadro di e mision comercial lidera pa Minister di Economia, mr. Geoffrey Wever.
Maria Dijkhoff-Pita, Director di Directie Economische Zaken, a splica cu e mision tabata uno hopi fructifero. El a mantene varios combersacion cu diferente ministerio na Surnam, cual el a considera cu tabata hopi positivo.
El a destaca e posibilidad di colabora cu Surnam, un pais cu tin hopi di ofrece y na mes momento, Aruba tambe tin conocemento cu e lo por comparti cu Surnam. E delegacion comercial tabatin varios reunion cu companianan Mericano, cual sigur a laga nan hopi satisfecho.
Mas aleu, Dijkhoff-Pita a menciona cu tin oportunidadnan pa haci negoshi cu e companianan. E ta considera cu nan ta logrando hopi exito durante e mision aki. El a destaca e apertura di posibilidad pa e Surinameñonan traha hunto cu Aruba como un di e puntonan culminante di su bishita.
El a subraya cu e mision ta un bon oportunidad tanto pa Aruba como pa Surinam. El a mantene combersacionnan cu companianan di logistica pa mehora e transporte di producto pa Aruba, cual e ta considera como un oportunidad excelente.
Tambe Maria extende un invitacion pa un delegacion di Surnam bishita nos isla cual p’e sigur tabata un momento masha destaca di su mision. Pero tambe, a invita e pueblo di Aruba, pa bishita Surinam. El a anuncia tambe cu Presidente di Surnam lo bishita Aruba na october y a expresa su deseo di sigui cu e reunionnan aki.
Tocante un posibel acuerdo, Maria a indica cu Minister Wever a propone un Memorandum of Understanding, pa formalisa e colaboracion entre ambos pais.
Riba e pregunta di posibel acuerdonan concreto, directora di Economische Zaken a confirma cu tin algun comerciante ya caba a firma contractnan. Aunke cu e no ta na altura di e detayenan exacto di cual ta e comerciantenan cu a firma, e ta reconoce e importancia pa exito di e futuro misionnan comercial.
Por bisa cu di parti comerical y di parti di Gobierno, den diferente areanan, e ministernan tambe ta habri pa firma un Memorandum cu Aruba. Di ambos parti tabatin logronan concreto pa Aruba.
Kisas p’e aña aki e no ta kere cu lp tin un mision concreto, pero pa otro aña tin planea pa otro mision. Mision ta tuma tempo, preparacion y tambe ta costa placa.
Riba un posibel destino pa e proximo mision comercial, Maria Dijkhoff-Pieter a indica cu e ta laga esey na Minister mr. Geoffrey Wever pa informa di esaki.
