Awe mi kier a subraya un rapport cu IMF a saca riba performance di nos economia 2022/2023. Mi lo trata diferente punto p’asina pueblo por compronde y yega n’e conclusion cu Aruba su economia ta recuperando. Esaki sigur ta un bon noticia pa pueblo, pero mas cu esey, e ta un evidencia y fruto di un trabao serio y responsabel di Gabinete Wever-Croes-II. Aruba y e mundo a navega den e crisis di pandemia cu un sabiduria y forsa y awo un biaha mas Aruba ta riba e caminda di recuperacion economico y ta cumpli cu aprobacion cu un organo di autoridad y influencia global manera esun di IMF pa bon maneho y logro importantisimo.
NOS DEBE NACIONAL TA BAHANDO
Den un di e puntonan aki, nos por wak cu nos tabatin un debe di 112.3% di nos GDP na 2020, y na 2022 e debe a baha caba pa 90.7% di nos GDP! Ta premira, si nos economia keda mantene e mesun resiliencia y gobierno mantene su disciplina pa tene gasto abao, nos lo sigui baha nos debe nacional na 2028 te na 71% di nos GDP. Un logro enorme! Ta p’esey e ta importante pa nos pais sigui produci surplus tur aña pa nos por sigui paga e debe y su interes p’asina gobierno por tin mas espacio pa inverti den e pais atrobe!
NOS GDP TA CRECIENDO
IMF den su ultimo rapport a declara cu e recuperacion economic di nos pais ta impresionante! IMF ta pronostica cu nos GDP lo crece cu 2.3% e aña aki y cu e añanan venidero esaki lo crece cu 1.1%. Na 2021 nos GDP a crece cu 27.6% y na 2022 el a crece cu 7.3%.
NOS ECONOMIA TA CRECIENDO GRANDEMENTE
Banco Central di Aruba tambe a saca su “State of the Economy” di ultimo kwartaal di 2022 y a bisa cu nos economia a recupera 9,6%!! CBA ta hasta bisa cu nos economia actual a surpasa e nivelnan pre-pandemico!! Banco Central, IMF y gobierno ta confirma cu Aruba ta riba bon caminda. Si economia subi, debe lo sigui baha, nos pais lo cuminsa wak e inversionan aumenta atrobe.
DI UN DEFICIT DURANTE PANDEMIA NA 2020 PA UN SURPLUS NA 2023
Un di e problemanan mas grandi di Aruba, specialmente den e maneho di Gabinete Eman-I & II ta cu tur aña tabatin un deficit entre 180 miyon pa 445 miyon florin. Esaki a hiba nos debe te na casi 90% di nos GDP. Den e rapport di IMF nos por wak con structuralmente di pandemia enadelante gobierno a bin reduci gasto grandemente y a traha duro pa produci un surplus den nos presupuesto. Esaki ta hopi importante pa compronde, ya cu sin un surplus no por paga riba e debe y Aruba ta keda sink. Pesey IMF a duna e siguiente cifranan; Na 2020: -/-16.2% di deficit causa pa prestamo pa salvaguardia pueblo y e negoshinan den tempo di pandemia, 2021; -0.5% di deficit, apenas saliendo parcialmente di pandemia, y aworaki na 2023: 1% surplus cu ta representa mas o menos 63 miyon florin.
IMF A CONCLUI CU E GASTONAN DI GOBIERNO TA ABAO Y APROPIA
Contrario cu loke cierto gremio y oposicion kier bende pueblo, ata IMF ta indica cu e gastonan di gobierno baha na un nivel apropia. Contrario n’e rumornan y informacion falso cu e opositornan ta vocifera, IMF ta confirma cu e nivelnan di gasto di gobierno ta riba un bon nivel. Esaki a confirma na varios ocasion tambe pa minister Xiomara Maduro. Aworaki pueblo por tin e siguransa cu IMF su rapport ta un sla fuerte cu ta bergonsa e opositornan pero alaves un celebracion cu nos ta riba e bon caminda!
