Diamars 25 di Juni tabata tin e reunion di e Ley di Presupuesto Supletorio den sala di Parlamento. Un ley cu a demostra e bon maneho di Aruba su finanzas publico, cual a wordo refleha den e cifranan di e ley. No tabata tin gastonan adicional den e presupuesto supletorio y tur cos a bay segun e normanan di CAft.
Rebaho Structural di e debe nacional
Den e ley Parlamento por a lesa con na 2023 a paga 153 miyon florin riba e debe nacional, cual ta un suma significante. Di e 282 miyon florin di surplus, 153 miyon florin a wordo paga riba e debe di 2023 y 129 miyon lo wordo uza pa paga riba e debe nacional na 2024. Esaki ta demostra un biaha mas a seriedad y consistencia cu cual gobierno ta bezig ta acapara cu e debe nacional. CAft den su rapport riba ultimo “Uitvoerings Rapportage di 4 de kwartaal” ta indica cu Aruba ta riba bon caminda pa yega 70% di debe pa GDP pa aña 2027 y pa yega 50% di debe pa GDP hasta prome cu aña 2040. Actualmente e debe pa GDP di Aruba ta na 79% segun Caft, cual ta un logro enorme.
Gobierno ta stabilisando nos pais
E yabi di stabilidad ta pa maneha nos finanzas publico di un forma responsabel y sostenibel. A pesar cu nos pais apenas a sali dos aña pasa for di Pandemia, awe nos por wak cu 2023 y 2024 ta añanan di un recuperacion fantastico. Danki ne seriedad y disciplina di gobierno a logra cambia rumbo di nos pais y a logra surplusnan cu a wordo paga riba nos debe nacional. Si un nacion ta stabiel e ora ey su fundeshi financiero y economico ta fuerte. Esaki ta empodera gobierno pa cuminsa cu iniciativanan concreto pa yuda nos ciudadanonan acapara cu e poder di compra cu a wordo perdi den e ultimo añanan. Tur hende ta compronde cu e prijs di transporte, petroleo y gueranan a afecta prijs di produccion y productonan den exterior, y asina Aruba ta importa tur e inflacion di otro paisnan.
Iniciativanan pa fortalece poder di compra di esunnan den necesidad.
Danki na e disciplina di gobierno nos economia a crece, nos turismo ta kibrando record y tur cos ta mustra cu nos pais ta recuperando den pasonan acelera. Kico gobierno ta haciendo pa cuminsa yuda pueblo?
1. Pensioen di Aruba a subi 4 biaha y a yega na un aumento di 14.7% sin conta e aumento cu lo wordo anuncia e aña aki ainda.
2. Ambtenaar lo hay indexering di 11.7% y trahado di stichting ta bay haya 2.8 miyon florin.
3. Uitkering pa hende descapacita lo bay subi. E suma exacto lo wordo anuncia pronto.
4. Salario Minimo a subi pa 1.986 florin.
5. Prima di AZV pa pensionado a baha cu 1.5%.
6. Lo bay aumenta e reparatie toeslag pa pensionado.
Te asina leu, e comunicado di Parlamentario Marco Berlis, di partido MEP.
