Kico ta nifica, tene man di Dios, esey ta nifica duna Dios tur autoridad riba nos bida, den cual nos ta declara cu Cristo Hesus ta Rey y Señor di nos bida segun Marcel Balootje.
Dicon nos tin di hacie? Pasobra nos ta bibando den tempo dificil, tempo trabahoso, un tempo caminda hopi cos ta parce bon, pero nan ta completamente contra boluntad y principionan di Dios, caminda hende a bira stimado di nan mes, y ta haci compromiso cu mundo.
Nos confiansa mester aumenta tur dia mas y mas den Dios, pasobra solamente Dios merece nos confiansa, pasobra Dios ta balora tur su yiunan, Dios tin nos den su plant’i man. Dios ta stima nos cu un amor eterno.
Nos mester tene man di Dios, pa e por guia nos bida , y nos famia, tin hopi guiado falso ta bay rond, buscando fama, papiando di nan mes , pero nan ta nenga Su poder.(2Timoteo 3:5).
Señor su man ta poderoso.
Señor su man ta victorioso.
Señor su man ta haci milager.
Señor su man ta kibra tur cadena di maldad.
Señor su man ta trece libertad .
Den e man di Señor tin salbacion, redencion y liberacion.
Den e man di Señor tin pordon, goso , y paz.
2 Timoteo2:19 ta bisa: Sinembargo e fundeshi firme di Dios ta para, seya cu e inscripcion aki:
Señor conoce esunnan cu ta di dje ,y laga tur esunnan cu ta menciona e nomber di Señor abstene di maldad.
P’esey ta hopi importante , pa nos tene na e man di Dios, pasobra ta for di dje solamente sabiduria y integridad ta bini, no tin bienestar si nos bida no ta completamente entrega na Dios, y nos ta den Su man , pa asina e por guia nos bida.
Man di Dios ta nifica poder di Dios.
Cristo Hesus ta sinta den cielo na man drechi di e Tata, man drechi ta nifica man di autoridad, man di confiansa, man di poder.
Ora nos ta tene na e man di Dios , nada ni ningun hende por saca nos por di su man (Romanonan 8:35-37)
Esunnan cu pone tur cos den man di Dios lo mira man di Dios den tur cos.
No laga hende cu no ta kere den Dios, stroba bo cu palabranan negativo, tene na Dios su man, y sigui confia den Dios.
Ora e man di Dios ta guia bo, scuridad no por haci bo nada, pasobra den bista di Dios scuridad y luz ta igual, Dios sa tur cos y Dios ta mira tur cos.
Hende no mester perde tempo den maldad, rabia, orguyo, vengansa,pasobra den ningun di e cosnan aki tin ganashi , solamente decepcion.
Tuma nota di e hende perfecto, y observa esun cu ta recto,pasobra e hende di pas lo tin descendiente.(Salmo 37:37)
Esun cu ta tene man di Señor ta tuma su refugio den Señor, esun cu ta busca rikesa di mundo, ta tene man cu e malbado, p’esey dia tras dia nos ta mira con hende ta kibra otro, pasobra e man cu nan ta tene ta man di e malbado, cu solamente a bini pa horta, mata y destrui.
E cara di señor ta contra hacidonan di maldad, pa corta e recuerdo di nan kita for di riba tera.( Salmo 34:16)
Ken cu ta kere cu Hesus ta e Cristo ta naci di Dios,y ken cu ta stima e Tata ta stima e Yiu cu ta naci di dje. ( 1 Juan 5:1)
