Un feliz siman. Den e evangelio di Mateo Capitulo 4 vers 8 te cu 10, diabel ta aserca Hesus y mustre reino nan di mundo y nan gloria, y bisa Hesus cu tur esaki lo mi dunabo si bo tira bo curpa abao y adorami.
Hesus a contesta y bisa : Bay for di aki nan Satanas pasobra ta para Scirbi: Adora Señor bo Dios y sirbi E so. Awor nos ta mira cu locual Hesus a rechasa , hende ta acepta.Pa cual motibo hende ta acepta, pa falta di conocemento, pa falta di respet pa Dios, pa falta di temor di Dios, pa negoshi, y mas cu tur cos pa rebeldia contra e palabra di Dios.
Tur e tipo di fiestanan cu ta bay contra e palabra di Dios a cuminsa hoooopi anja pasa.Pero segun mundo ta bira moderno enbes di hende aparta, hende ta serca, pasobra e diabela keda e mesun colebra di antiguedad, e no a cambia e ta buscando adoracion di tur esnan cu di un of otro forma kier adore. Y nos ta mirando cu adoracion di diabel ta bira legal, pasobra un fiesta di asina yama celebracion di morto, caminda bo tin di expresa bo mes den un disfras cu demostra cu bo a Sali for santana, no tin nada di haber cu bida den Cristo.
Awor cu e fiesta aki ta practicamente legalisa, y ta un ganashi commercial, hende mester comprende, ken nan ta invoca durante e fiesta ey , y no critica, cu tin bochincha, bringamento,muziek duro,pega mento di candela, losmento di tiro,libertinahe, bebemento na gran escala, pasobra ora bo drenta un neishi di abeha bo no por Sali sin ningun pica bo, den un simpel palabra locual bo sembra bo ta cosecha. Tin hende ta bisa cu e celebracion ta un wega,e ta un cos di antaño e no tin nada di haber cu diabel, pero bo ta mira e resultado cu e cosnan extremo cu ta tuma lugar ta forma parti di adoracion di diabel.
Awor con porta si nos ta sirbi Dios den nos cas, cu nos bida y cu henter nos alma, y ora un cos pasa cu nos prome cos cu nos ta haci ta yama riba e nomber di Dios. Awor cu Covid-19 a suta Aruba y otro paisnan na mundo, tur hende ta sclama pa e misericordia di Dios, pasobra no tin remedi, no tin vacuna, si hendenan a sana ta pa Dios su misericordia y ayudo di esnan cu ta traha den hospital y otro lugarnan cu awe hopi por bisa cu nan ta libra di e virus.
Dicon ora un hende ta malo e no ta bisa bay cumpra un disfras di difunto, un di diabel, pa e bisti y wak si e malesa ta bay , dicon famia no ta hiba un disfras pa persona den hospital ora e ta den ICU, pa asina pa medio di e disfras ey e lanta bira bon y bay cas.
Shonnan Pueblo Di Aruba, Curacao, y tur caminda cu e noticia aki ta yega, ta bira tempo pa respeta Dios, pasobra si Hesus mes a bisa diabel cu ta Dios so nos ta Adora, tin un motibo, pa nos como hende y cu ta bisa cu nos yiu di Dios no trapa den caminda cu nos Señor a aparta for di dje.
E resultado durante di e fiesta y despues di e fiesta, hopi biaha ta keda sconde , pero tin hopi caso ta termina na psycologo, door cu e influencia satanico , ta dañino pa mente y curpa di hende. Mi no sa si tin hende ta corda den tempo pasa, con nos islanan tabata importa musica di paisnan bisiña manera Cuba, y tambe mas lew Mexico, Inglaterra etc, y nos fiestanan tabata termina cu violencia, pasobra tin paisnan cu den nan cultura na ta inclui adoracion di diabel.Por favor tene bon cuenta cu esaki pa bo cas y Famia. Y hopi di esakinan ta wordo expresa dem Tattoo y corte di cabey y nos ta djis sigi moda, sin busca drechi realmente kico tin su tras.
Den e buki di Josue ta para scirbi den Capitulo 24 cu ami y mi cas lo sirbi Señor, esey ta e decision cu Josue a tuma ora e a mira e pueblo ta bay den direccion di Idolatria, Y e a compronde cu hende idolatra ta hende cu ta rebeldia contra Dios, asina e kier a mustra e pueblo cu ta Dios so nos por adora.
Awor hopi hende ta bisa cu nos no ta adora, ta un Fiesta, ta un Yoke, ta un wega, pero e resultado durante y despues di celebracion no ta mustra asina.
Wak pa den bo no tin nada cu ta duna adoracion na diabel den bo cas, pasobra awendia, tin hende cu pa posicion, poder, politica,negoshi, ta adora diabel pa nan haña locual cu nan kier. Y ta lubida cu or abo muri bo muri bo no ta bay cu nada. Pasobra hopi mandatario mundialmente ta mustra publicamente con nan ta tuma baño di buheria pa asina fortalese nan posicion, hasta tin consulta cu morto publicamente, y nan ta bay asina lew di pase na t.v. y pone riba facebook.
Pueblo esaki ta un Wake up Call pa cada Cas, Famia,pa bida di bo yiunan,Organisacion,Institucion, na unda cu bo por ta , den e posicion cu bo ta encontra bo mes awor aki, si diabel asercabo pa adoracion,bo tin di haci manera Hesus a haci bisando: BAY FOR DI AKINAN satanas, PASOBRA TA PARA SCIRBI ADORA BO DIOS, Y SIRBI E SO. Sea Cauteloso.Nos ta Propiedad di Dios.
