Diabierna, 28 di juni 2024, Teniente Naval 1e klas Marc Jereskes a pasa comando di nave di apoyo Zr.Ms. Pelikaan na Teniente Naval 1e klas Max Borsboom. E traspaso di comando a tuma luga na pier RIMA na base di Marina na Parera, den presencia di tripulacion y famia di ambos Comandante.
Marc ta mira bek atras riba un periodo bunita: “Ta duna mi hopi satisfaccion ora mi mira bek riba e periodo aki. Mi ta orguyoso cu mi tabata forma parti di un team, den cua e tripulacion tabata para cla pa otro, di dia y anochi.”
![](https://24ora.com/wp-content/uploads/2024/06/Oude-cdt-blikt-terug-1920x1280.jpg)
E ehercicio internacional ‘Tradewinds’ tabata e ultimo ehercicio grandi pa Marc, como Comandante di Zr.Ms. Pelikaan; durante esaki e lasonan internacional den Region Caribe a keda fortalece y e tripulacion di Zr.Ms. Pelikaan a keda di train pa ta desplega durante temporada di horcan.
E Comandante entrante, Max Borsboom, a start su carera como Oficial di Warda riba Zr.Ms. Rotterdam y despues a sirbi entre otro como Oficial di Buceo na Grupo di Sambuyado na Defensa, y tambe como Oficial di Defensa Aereo riba Zr.Ms. Evertsen.
![](https://24ora.com/wp-content/uploads/2024/06/Oude-en-nieuwe-commandant-PELI-960x1440.jpg)
Max ta anticipa su prome Comando riba un Barco di Marina: “Mi ta considera esaki un honor grandi cu durante e añanan binidero mi por eherce e Comando riba Zr.Ms. Pelikaan, mi tin hopi gana di haci esaki! E ta un responsabilidad grandi pa rendi sosten relevante maritimo militar cu e barco versatil aki y su tripulacion dedica; no importa di unda cu esaki ser pidi. Nos t’ey cla pa esey!”
Bou di guia di Teniente Naval Max Borsboom Zr.Ms. Pelikaan ta continua cu su tareanan operacional.
![](https://24ora.com/wp-content/uploads/2024/06/Bemanning-Pelikaan-met-nieuwe-CDT-1920x1280.jpg)