San Nicolas ta conoci pa su tono colorido Caribense caminda cu hopi turista ta bishita, no solamente pa nan bay Baby Beach of e museonan cu tin, manera Museo Industrial of Nicolaas Store por ehempel.
Sinembargo tin un situacion cu ta di preocupa y esey ta e parti di sushedad cu tin plama diferente parti di e districto aki.
Ya ta pa varios dia caba, varios habitante a bin tuma nota cu dilanti di Hulpbestuurskantoor ta na werki, yena cu sushi y sin mantencion.
Nos reportero tabat’ey presente n’e sitio y mesora a cuminsa haci su trabao di informa con e situacion ta, mirando cu tin turista cu ta haci uzo di e area aki. Sigur e ta un mahos bista y en particular cerca di e estatua di Lolita riba e plasa den vecindario, cerca di e parada di bus y tambe e oficina di turismo cu tin net su dilanti. Por a nota hopi foyo benta eynan.
No mucho leu di e plasa, n’e Hulpbestuurskantoor mes, por mira tambe un cash’i coriente cu a bin abao. E no tabatin ningun caminda mas pa wanta door di e frusto.
Autoridad sigur mester tene cuenta cu e situacion aki, ya cu San Nicolas tambe ta ‘behoor’ na Aruba, e merece e mesun atencion cu Oranjestad of e otro barionan tin.
