No ta mucho dia pasa cu Minister Geoffrey Wever tabata na Brussels den cuadro di un subsidio cu a ricibi for di Union Europeo. Esaki ta den cuadro di e-Government. Wever no tabata su so na Brussels, cabes di gobierno, mr. Evelyn Wever-Croes hunto cu GevMin, mr. Ady Thijsen tambe a forma parti di e delegacion. Aruba a firma pa ricibi 14 miyon Euro pa digitalisa henter nos aparato gubernamental.
Ta hopi placa esey y por lo menos un miembro di parlamento kier sa con gobierno lo gasta e cen. E kier sa riba cua cuenta e placa lo yega tambe, sea ta riba di algun instancia of na Directie Financien. E kier sa con lo controla si a uza e placa bon of no. E hasta kier sa si e minister lo duna cuenta na parlamento cu rapport pa sa kico a haci cu e placa.
Miguel Mansur di e fraccion Accion 21 a manda no menos di dies pregunta n’e Minister di Asuntonan Economico p’asina e haya un miho bista riba con lo reparti e placa y di ki forma lo gast’e. Parce cu e logro aki ta di e mandatario mes, hunto cu Departamento di Asuntonan Economico. Por lo menos si ta den man di DEZHI, tur hende lo por ta trankil.
