Despues di dos aña e Pagara tradicional y e paranda di fin di aña di Renaissance Aruba lo ta dia 31 di December. Renaissance Wind Creek Aruba Resort lo cende e pagara tradicional pa 1’or di atardi dilanti di Wind Creek Crystal Casino y lo sigui bay te cu Renaissance Marketplace!
E pagara di e aña aki lo ta di 6 miyon tiro y naturalmente lo conta cu ambiente di dande y Robert Jeandor y su Solo Banda Show na e stage principal na Renaissance Marketplace.
E pagara di Renaissance Aruba ta un tradicion pa varios aña caba, for di tur skina ta yega mirones pa presencia e pagara di mas grandi den centro di ciudad. Paul Gielen, General Manager di Renaissance Wind Creek Aruba Resort ta comenta cu nos ta sumamente contento di por ta bek despues di 2 aña door di COVID-19. Tawata un periodo cu hopi reto pero hunto como un famia nos a sa di surpasa esaki y por mira e frutonan awe.
Pueblo di Aruba ta keda invita pa habri aña hunto cu e famia grandi di Renaissance Wind Creek Aruba Resort. Probecha di haci e ultimo shopping prome cu aña caba y ainda participa den nos campaña di ‘Believe in the Magic’ di Renaissance Mall, regalando un vakantie di bo soño cu un balor di $5000, 1 weekend stay na Renaissance Wind Creek Aruba Resort, cena pa 2 persona na L.G. Smith’s Steak & Chop House, cena pa 2 persona na Aquarius, 5x Gift Certificate di un balor di $200 na Renaissance Mall of 5x Gift Certificate di un balor di $200 na Renaissance Marketplace.
Pa participa ta hopi facil, skirbi bo nomber, email y number di telefon patras di bo recibo di un di e tiendanan di Renaissance Mall, deposita esaki den nos Christmas box situa den e centro di Renaissance Mall. Lo anuncia e ganadonan dia 11 di januari 2023.
Renaissance Wind Creek Aruba Resort ta desea henter pueblo di Aruba un Feliz Aña 2023!
