“Pa hopi aña caba tin un grupo di trahado di Stichting voor Verstandelijk Gehandicapten Aruba (SVGA), situa na Piedra Plat # 97-A na Paradera, ta wardando riba un aumento di nan salario cu nan tin derecho riba dje. Debi na cambio den forma con gobierno ta subsidia e fundacion, esaki a tranca”, asina Elvira Arias-Tromp, Afdelingshoofd di Centro Man Na Obra, a skirbi mayornan den un carta fecha dia 27 di november 2023.
Bestuur di SVGA a tuma e decision recientemente pa NO tuma trahado nobo por lo pronto na luga di coleganan cu ta bay cu pensioen, pa por lo menos por adapta salario di e grupo di trahadonan cu ta warda esaki entrante 1 di januari 2024.
Aumento di tur gasto a pone cu e subsidio cu SVGA ta haya for di Minister di Asuntonan Social, Rocco Tjon, no ta suficiente.
Cuido, trasporte y organisa actividad a bira mas caro.
Esaki tin como consecuencia cu Centro Man Na Obra lo start januari 2024 cu dos empleado menos cu ta baha cu pensioen.
Cu dos trahado menos, ta nifica automaticamente cu SVGA ta hay’e obligatoriamente na baha e cantidad di cliente cu nan por brinda guia diariamente. Di 75 cliente diario, e Centro awo lo baha cantidad di cliente desde dia 1 di januari 2024 na solamente 60 cliente diario!
Pa hopi aña caba Centro Man Na Obra a brinda un programa adapta na clientenan cu a yega un edad avansa y/of yega nan top di funcionamento y no ta apto mas pa cu e meta di afdeling cu ta: siña aspectonan laboral. E grupo aki lo stop di existi entrante januari 2024.
Esaki por tin den futuro consecuencia pa participacion di algun cliente of cu nan participacion por bay bira part-time (dus menos dia pa siman).
Mirando cu Centro Man Na Obra awor ta completamente yen y ta bay tin lista di espera, lo ta mas estricto tambe cu ausencia di cliente. Cliente cu ta hopi ausente por perde nan luga pa habri espacio pa esunnan cu si kier bin “Centro”.
Regla over ausencia ta: 3 luna ausente den 1 aña cliente ta perde sa luga.
“Mi sa cu esaki no ta noticia mucho agradabel pero ta na su luga pa informa tur mayor/famia di cambio cu CentroMNO lo tin entrante januari 2024”, asina Elvira Arias-Tromp, Afdelingshoofd Centro Man Na Obra na Stichting voor Verstandelijk Gehandicapten Aruba, a termina bisando. Por mira awo cu, aunke gobierno a priminti cu e hende ta central, cu cortamento den subsidio, specificamente den fundacionnan social, awo tin como consecuencia cu 15 ciudadano handicap lo keda sin guia diario.
