Diasabra ultimo a tuma luga un ceremonia di graduacion na Universidad di Aruba. Diesdos persona a grauda, seis como bachelor y seis como ‘Master of Business Administration’. Entre esunnan cu a gradua como ‘master’, tabatin director di Departamento di Impuesto, mr.Luenne Gomez-Pieters.
Durante e ceremonia, a combersa cu Gomez-Pieters, el a conta cu e yena cu sentimento di alegria y di logro. Ta un trayecto cu el a cuminsa na 2022 y cu porfin por a logr’e. Como director di Departamento di Impuesto e tabata tine basta ocupa pa cu reforma fiscal pero tambe introduccion di ‘landspakket’, pues Luenne tabata busca algo pa manten’e bezig, no cu e no tabatin suficiente trabou pa haci sino simplemente algo pa yen’e cu energia renoba p’asina sigui lidera Departamento di Impuesto.
E opleiding a dura dos aña, por pensa den direccion di cursonan manera lider y etica, strategia den organisacion y mucho mas. No solamente nan strategia sino con pa aplic’e. Luenne a defende su tesis cu e topico di “Actitud y comportacion pa cu contribuyente na Aruba” cu exito. E no tabata facil, a traha cu un profesor cu ta pusha bo hopi, te na bo limite. E resultado di su investigacion ta cu e contribuyente ta haya si e sistema di impuesto ta comprendibel, nan ta cumpli mas lihe. Si e ta complica, nan casi no ta cumpli. Locual a resalta, ta e simplesa di nos leynan fiscal, tin cu bay traha riba dje, pero tambe e confiansa den gobierno.
Awo cu tin e resultado, Gomez-Pieters a opina cu tin trabou pa sigui haci, e ta na altura cu no ta ainda unda cu nan kier ta pero ta cosnan cu lo sigui traha duro pa yega eynan. Esaki ta Luenne su di tres master. Na universidad, e profesornan ta pusha Luenne pa sigui cu su PHD pero na cas, famia tin obhecion. Kisas, ora su yiunan bira mas grandi, e lo pens’e.
E master aki tabata pa Luenne, el a sintie masha cerca di su curason. Como director di un departamento asina importante, sa duna hopi tempo di bo mes y esaki tabata un momento perfecto pa haci algo propio, pa cual a haya hopi energia di dje. E balansa tabata pisa, director di un departamento, mama di tres yiu, casa y lidera dos proyecto asina grandi pa nos pais, tabata uno pisa. E ta un regalo propio, Luenne a termina bisando.
