Dialuna pa mas o menos 5:45pm a drenta un melding na Polis di un auto cu a alcansa un mucha riba bicicleta, na altura di Centro Colorado den Lago Colony. Parce cu un auto marca Suzuki modelo Swift color cora cu number A-52286 a bay pasa un otro auto y ora a bay bek na su banda a dal un ciclista di atras, mande halto.
E victima a resulta e ciclista Rechenel “Richi” Statie di 17 aña di edad y kende ta un miembro activo di Hubada Cycling Team Aruba. E club a lamenta e susedido aki, specialmente pasobra por a evita e accidente aki. Tambe ta lamenta cu chauffeur di e Suzuki Swift no tin rijbewijs tampoco, pues no ta mishi’e riba caretera mes.
E club di bicicleta a conta nos cu nan miembro ta den un estado delicado interna den hospital awor, cu hopi fractura, den lomba, ribchi y sla na cabes. Su situacion ta asina serio cu specialistanan ta wardando awor pa mande cu Air Ambulance cu urgencia pa Colombia. Ta purbando pa realisa e biahe awe dialuna anochi ainda, debi na seriedad di su situacion.
E club a pidi su miembronan y henter nos isla pa haci un oracion pa pronto recuperacion di Richi Statie. Dokternan tin’e drumi pa e sla na cabes por recupera riba su mes. Den tipo di accidentenan asina, e prome 48 oranan ta crucial, pa cual ta haciendo tur posibel pa manda e pashent pa tratamento specialisa na Colombia.
