Na Aruba tin hopi persona cu tin amor, pasion pa arte. Tin diferente tipo di arte y den e caso aki Lislaine Bermudez a persigui pintamento. E ta pinta, skirbi y canta. Recientemente el a saca su di cuater cantica cual ta ‘Ami Cu Bo So.’
Lislaine Bermudez, artista y conoci como e nomber artistico AVALI, a conta cu el a cuminsa skirbi desde cu e tabatin diescinco aña. Pero a cuminsa pinta ora e tabatin binti aña. Pa loke ta cantamento, mas o menos cuater aña pasa el a cuminsa dedica na esaki. Aki tabata unda el a tuma un curashi y a cuminsa traha su mesun canticanan y haci nan publico.
![](https://24ora.com/wp-content/uploads/2024/07/IMG_9936-1920x1280.jpg)
Hopi cos ta motiv’e pa skirbi cantica. El a recorda cu su ruman a fayece tempo e tabata mas hoben y skirbimento tabata e manera cu e tabata uza pa expresa su mes. Y te fecha di awe ainda esey ta e forma con e ta expresa su mes.
![](https://24ora.com/wp-content/uploads/2024/07/WhatsApp-Image-2024-07-01-at-6.11.13-PM.jpeg)
Awendia Bermudez no solamente ta skirbi, pero ta dedica na pintamento como canta. Desde cu e tabata mucha arte ta algo cu e gusta. Mas grandi el a bira, el a dicidi di bay explora diferente tipo di arte. Na momento cu el a cuminsa pinta, esey tabata loke a hala su atencion mas.
Pa loke ta cantamento, segun AVALI, esaki ta algo cu semper el a gusta haci. E no tabatin e curashi pa saca su canticanan. Pero eventualmente el a tuma un curashi y a presenta su canticanan. Pa awo e tin cuater cantica saca, di cual e mas recien ta ‘Ami Cu Bo So.’
![](https://24ora.com/wp-content/uploads/2024/07/NW_AVALI-cantica-nobo-4.jpeg)
Pa dos aña e no a saca ningun cantica, p’esey su recien senciyo ta ‘Ami Cu Bo So.’ Durante e tempo ey AVALI a traha riba hopi cantica. E tin rond di sesenta cantica cu ta casi cla. Recientemente el a saca su cantica nobo, cu ta un cantica romantico R&B y ta dedica na su pareha. El a expresa cu dos aña pasa el a skirbi e cantica aki caba, pero awo a bin sac’e. Desde cu el a saca e cantica aki, e ta bayendo bon. E mes ta sorprendi cu hopi hende a gusta e cantica aki.
E idea no tabata pa laga dos aña pasa sin cu el a saca algo, pero hopi cos a pasa. Aworaki mes e ta bezig ta inverti den otro cos. Na final di dia un produccion ta costa basta placa. Sinembargo, asina mes e kier a saca algo. El a bisa nos cu e no tin pensa di laga hopi tempo pasa sin cu e saca algo nobo un biaha mas.
Pa mas lesa TREMPAN.COM.