Si wak e ultimo lunanan, Geert Wilders a modera su posicion hopi riba e temanan cu e tabata hopi fuerte riba dje di Moslim. No sa con su sentimentonan ta awo den e partido pa loke ta e islanan den Caribe Hulandes. Ta importante pa wak esey den e temponan aki y por ta tin cierto moderacion. Si no tin moderacion, por convence nan pa modera, segun lider di partido AVP, Mike Eman.
Ultimo cu tabata na Hulanda a topa cu hopi di e lidernan politico y toch ta mira cu ora bin cu bon plan, manera cu a presenta na Hulanda, porta ta habri. No ta descarta cu Wilders ta gobernante. Eman tabatin e honor y responsabilidad, tempo cu e tabata prome minister, cu Wilders a pasa un siman di vakantie na Aruba pa por a acomod’e durante su vacacion na Aruba.
E tempo ey e tabata un persona cu tabatin mester di siguridad hopi halto, aunke ainda e tin mester. A provee e tempo ey tambe e siguridad y a dun’e hospitalidad di Aruba. Por ta algo di esey tambe a keda den su menta cu a pesar cu factor den su partido tabata hopi critico di e islanan, ora cu e mes a bin Aruba pa pasa algun dia di descanso, e tempo ey, como Prome Minister, Eman a tuma e responsabilidad pa sigura su siguridad personal, cu tabata un reto e tempo ey.
Tabatin combersacion basta ameno tambe. Ta spera cu tin algo manera un recuerdo positivo di su bishita na Aruba y e hospitalidad cu e pueblo Arubano a demostr’e e tempo ey.
Tema cu e partidonan ganado a enfoca riba dje tabata ‘bestaandszekerheid: E realidad socio economico di Hulanda, cual t’e preocupacion grandi di e pueblo Hulandes. Di esey ta mira hopi similaridad cu e situacion na Aruba. Ta tende gobierno papia di balanced budget, papia di surplus, pero ta mira e realidad den pueblo, mescos cu e partidonan cu a sali hopi victorioso na Hulanda cu no tabatin asiento, awo tin 20.
Tin e partidonan social cu a sali partido number 2. Por mira hasta un partido Wilders, cu por ta rechts riba tereno di migracion, pero e ta riba e caminda corecto pa loke ta trata e aspecto socio economico cu Wilders a reconoce cu tin un necesidad grandi, caminda cu e factornan economico no a traduci su mes den un calidad di bida husto pa tur hende y tin hopi pobresa hasta na Hulanda.
E enfoke ey ta uno cu ta comparti na Aruba y den e sentido ey toch ta saca un sentimento di curashamento di e resultado aki. Ta sinti cu e votado a honra e sentimento p’e lidernan politico cu a articula e sentimento cu e pueblo no por mas. E pueblo no por sufri mientras cu ta papia di un pais cu ta rico, of na Aruba ta papia di turismo ta grandi, ta papia di surplus, mientras cu nos grandinan no por paga remedi, mientras cu ta mira cu den hopi cas, no por pone cuminda riba mesa. Bestaansminimum ta 600 florin riba salario minimo.
Ta mira cu hende no por paga nan recibo di awa y coriente. Kiermen e mesun necesidadnan aki cu ta sinti den e pueblo aki, a refleha tambe den e eleccion na Hulanda. P’esey ta kere cu ora tin un inkietud cu ta biba aki bao, durante eleccion pueblo ta haya chens pa expresa e dolor ey cu ta biba den nan pecho, den nan curason. Por a mira tambe e mesun cos na Aruba. Diaranson anochi tabata den pleno organisacion di un evento grandi. Ta sinti cu den comunidad tin e mesun sentido tambe di compromiso pa un liderazgo cu ta enfoca riba e aspecto social economico di nos pais.
No ta scucha di ningun otro partido na Aruba e enfoke manera cu por a mira na Hulanda, cu esunnan cu ta hiba e bataya aki ta sali exitoso. Mescos na Aruba tambe, ta sinti cu AVP ta esun cu ta articulando e sentimentonan social economico te cu a yega Hulanda, cu e vision di percura pa un sociaal cultureel plan bureau cu ta bay marca e aspectonan social economico aki.
AVP ta hopi contento den e sentido aki, no necesariamente riba e aspecto di migracion, pero si riba e aspecto social economico cu a haya su reconocemento den e votacion na Hulanda diaranson.
