Diahuebs 6 di juni ta eleccion pa Parlamento Europeo y e ultimo dia cu nos na Aruba por vota pa Parlamento Europeo. E lider di AVP mr. Mike Eman a hay’e importante cu tur ciudadano Arubano cu paspoort di Union Europeo tin e derecho di voto. Ta lamentabel cu ainda mester inscribi prome, p’esey hopi no ta yega di eherce e derecho aki.
Eman despues di a vota hunto cu su esposa Doina y tambe den compania cu Wendrick y Wendert Cicilta a enfatisa cu e decisionnan tuma den Parlamento Europeo ta impacta nos bida diario aki na Aruba, demostrando cu nos mester tuma parti den e proceso democratico. AVP a traha duro pa e derecho di voto pa e ciudadanonan Hulandes den Caribe. Hunto cu dr. mr. A.G. (Mito) Croes, q.e.p.d. a logra un hurisprudencia grandi bao di e nomber Eman/Sevinger. Esaki a crea un precedente huridico cu ta ilustra cu tur ciudadano cu un paspoort di Union Europeo tin e mesun derecho.
Bao e liderazgo di mr. Mike Eman, AVP a guia e esfuersonan di cooperacion cu Union Europeo cu a permiti por ehempel e financiamento di e facultad nobo di Universidad di Aruba, conoci como SISSTEM. E proyecto aki ta enfoca riba sostenibilidad y innovacion, un area cu ta di gran importancia pa nos comunidad. E dossier di e facultad, conoci como Green Faculty, ta enfatisa e importancia di desaroyo sostenibel y innovativo.
![](https://24ora.com/wp-content/uploads/2024/06/Votacion-Parlamento-EU-Wendrick-y-Wendert-Maria-1.jpg)
Relacion cu Union Europeo ta habri porta pa Aruba por crece y desaroya den diferente area. E rapportnan di Union Europeo riba e regionnan ultraperiferico ta mustra claramente e beneficionan cu islanan como Aruba por tin den nan relacion cu e Union y e beneficio pa Union Europeo tin un relacion cu e islanan aki.
E participacion di Aruba den e eleccion di Parlamento Europeo ta crucial pa fortifica e relacion y pa sigui traha pa un futuro miho pa Aruba. Eman a enfatisa su deseo pa mira un candidato di Aruba mes den e proximo eleccion pa Parlamento Europeo, “algo cu nos tur mester traha duro pa logra.”
![](https://24ora.com/wp-content/uploads/2024/06/Votacion-Parlamento-Europeo.jpg)
Cu un representante nos Pueblo ta haya un bos directo den un Parlamento cu ta fiha cua pais y region afilia cu Union Europeo ta bin na remarca p’e fondonan pa proyecto di economia, infrastructura, enseñansa, energia alternativa; tecnologia di internet; beca pa estudio etc. Eman ta bisa cu desde 2009 AVP a stimula ciudadanonan di Aruba pa registra pa vota. E biaha aki no tabata tin un campaña special, pero e ta corda tur esunnan cu a registra na 2019 cu a pesar por ta cu nan no a haya un notificacion cu probablemente nan ta registra si pa vota. P’esey e ta conseha esunnan cu a registra na 2019 na VNO pa mira si nan ta registra y ora por haci uzo di nan voto. Corda bay cu paspoort y copia di paspoort.