Bintiun miembro den parlamento a dicidi y nan a aproba e ley di weg’i suerte.
Segun presidente di parlamento, mr. Edgard Vrolijk, a demostra cu e ley a aproba unanimamente, unda cu e parlamentarionan a sinti nan mes conforme cu e amiendanan. Ta un ley cu a scrutinia cu por biba cu ne. Tur hende sa cu si acepta e ley unanimamente pasobra e ta un ley cu a cumpli cabalmente.
Vrolijk ta sigui menciona cu ta mira e ley aki un positivo. Semper tabatin un problema riba e asunto di lotto y awo a sac’e. A haya basta carta fo’i Canada y e ponencia cu a trece tabata al caso. Aworaki e directiva di Lotto tin cu baha y segun Vrolijk, un Lotto nobo no ta na su luga aworaki, mirando cu ta den un crisis. Un hende cu ta den crisis no ta bay stop di cumpr’un lotto y awor aki ta disponibel. Canada tambe ta disponibel pa renegosha su contract.
UN LEY PREPARA
Segun parlamentario mr.drs.Arthur Dowers, tempo el a bira minister ocho aña pasa e ley di ‘kansspelen’ aki, traha pa e partido MEP y wanta pa gobernador e tempo ey, lo a bay regla pa ‘friends and family’ bira doño di e ‘gamingboard’ na Aruba. A para e ley aki. Despues di esaki, varios consulta entre e stakeholdernan a tuma luga pa tuma un ley nobo y definitivo den parlamento. Sinembargo, Dowers a splica cu awe el a tende prome minister ta purba gaba cu el a yega na un compromiso cu diferente partner pa nan pasa e ley awe, pero cu ta bou di presion di Hulanda esaki a tuma luga. “El a pasa un ley cu mi a laga completamente cla p’e.”
UN PONENCIA REFLEHA PA BANCO CENTRAL
Lider di fraccion di Accion 21, Miguel Mansur tabatin varios punto cu a trece dilanti den parlamento pa loke ta ley cu ta propone weg’i suerte. E ta conta cu un di e preguntanan mas importante ta con esaki lo afecta e ‘cost of doing business’ pa casino, mirando e temporada dificil cu nan a pasa aden.
Otro punto cu ta importante ta e acceso na e sistema financiero cu hopi di e catochero y casinonan no tin acceso.
Mansur a menciona cu minister Xiomara Maduro a anuncia cu Banco Central ta traha riba un ley pa garantisa acceso pa sistema financiero pa tanto priva como comercio.
Esey ta algo cu e partido a campaña hopi duro cu ne. Nan tabata e prome partido cu a hinc’e den plan di partido, ta haci cu Mansur ta contento cu ponencia di Accion 21 ta refleha bek door di Banco Central.
ENTIDAD SEPARA
Parlamentario Geoffrey Wever, lider di fraccion di RAIZ, a comenta cu durante di e tratamento di e ley pa loke ta trata wega di suerte, cu e idea ta pa bin cu un entidad separa cu ta bay regula full e sector pa loke ta casino y catochi.
Ta mas tanto pa Aruba sigui cumpli cu e recomendacionnan di FATF. Dos siman pasa a trata e ley di LAWTF. Esaki ta e continuacion.
Un di e preguntanan cu RAIZ tabatin ta e autoridad di e organo aki ta bay tuma over cierto autoridad di e minister di husticia. Esey ta nifica cu e rol di parlamento ta bira menos. E rol cu parlamento tin constitucionalmente pa controla minister ta bira menos. Esey a puntra e minister pa splica kico ta e motibo pa scoge pa un entidad toch mas leu di e control di parlamento.
Por a mira cu Raad van Advies tambe a señala esaki y kier contesta riba esey.
Tambe a nota cu den e ley tin un ‘bepaling’ cu ta bisa cu tin e autoridad pa revoca vergunning bao cierto condicion. Pero esey ta un stipulacion cu toch tin un tiki problema cu ne, pasobra e ta duna e autoridad demasiado poder y no ta duna e vergunninghouder suficiente proteccion.
INICIATIVA NOBO
Diabierna a tuma luga un reunion publico caminda a trata e Landsverordening Toezicht Kansspelen, cu ta e ley cu ta regula loke ta e area di casino, lotto y tambe negoshinan di catochi.
Segun parlamentario di fraccion di AVP, Gerlien Croes, e ley aki ya tin varios aña cu ta trahando riba dje y ta asina leu cu parlamento lo trat’e.
Parlamentario Gerlien Croes a haci varios pregunta riba desaroyo di e ley aki, considerando cu na prome instante cu e ley aki lo kita e exclusividad di e fundacion Lotto pa Deporte pa loke ta su derecho pa maneha Lotto. Loke a presenta pa e minister encarga ta un nota di cambio caminda cu lo bay kita e proposicion di e cambio aki y cu lag’e cu e fundacion lo keda cu e exclusividad.
Ta varios pregunta e parlamentario a haci riba diferente topico manera online gambling y tambe e datonan cu tin disponibel pa preparacion di e ley ya ariba menciona.
Sigur tabata un reunion basta interesante y hopi al caso, caminda cu ta ilustra cu mester cumpli regla internacional.
