“Un di e puntonan importante pa nos partido ta pa introduci mas proteccion pa e studiante. Si nos realisa cu docentenan no lo por duna les den un klas bashi, nos ta comprende cu e studiante tambe tin un posicion crucial den nos sistema di educacion. Pa hopi decada politiconan cu tabata nan yiu tabata bisa cu nan ta bay traha riba e mehoracion di e posicion di e derecho di e studiante.
Pa e motibo aki tin algun tema cu mi ta sinti nos tin cu papia ariba dje y nos cu tin cu realisa cu si nos bay keda cu e sistema di educacion aki nos lo percura cu studiantenan no lo ta prepara pa e futuro.” Esaki ta loke cu Leonardo Figaroa di Partido Direccion Politiea (PDP) a bisa.
Studiantenan mester mas proteccion
E ta bisa cu si e scucha su coleganan studiante di otro school e por conclui un cos. Hopi biaha ta trapa riba e derecho di studiante, esaki debi na e hecho cu tin un percepcion cu pasobra e maestro ta den un posicion di poder, debi cu e tin cu duna les pero tambe duna un cifra, esaki kiermen e studiante ta depende di dje, hopi biaha tin abuso di poder ta tuma luga.
E studiantenan ta wordo perhudica, ta wordo gepest tin ora djis pasobra e docente no gusta e studiante. “Mi no kier generalisa pero si mi a sinta cu algun studiante cu a conta mi nan experencia. Esaki ta e motibo cu mi a realisa nos mester introduci maneho y ley pa proteha e studiantenan na momento cu nan haya nan mes den un situacion unda cu nan no sa con pa bringa nan caso of pleita pa nan derechonan.
E ta importante pa nos introduci un sindicato manera tin na Hulanda un Landelijke Studenten Bond. Como sindicato, studiantenan lo por semper tin un bos pa representa nan na momento cu mester dicidi riba puntonan importante cu ta afecta studiantenan futuro.”
Tambe e ta bisa cu hopi biaha studiante no ta mira e importancia pa por lesa e reglamento, pero na momento cu tin algo a bay robes, e school ta tuma tur medida y e studiante no ta na altura di tur su derechonan y ki paso e mester tuma pa por defende su mes.
Debi na e puntonan aki e ta wak e importancia pa pusha pa crea un asociacion cu tin como meta pa representa e interes di studiante na e nivel internacional. Esaki ta importante pasobra por garantisa cu cada studiante tin un representante cu lo por defende su derechonan di studiante.
Introduccion di un Jeugdontwikkeling fonds
Un otro parti importante di e vision cu PDP tin ta pa crea un fondo pa stimula e desaroyo di hobennan. Un jeugdontwikkeling fonds cu kier introduci ta pa yuda e hoben den 3 aspecto importante.
1.Kier haci mas accesibel pa hobennan por forma parti di un na schoolse opvang traject cu ta importante pa yuda hobennan cu nan mayornan no tin fondo pa asina por cubri e gastonan aki.
a. E plan ambicioso aki tambe ta forma parti di nan plan social unda cu e ta importante pa activa tur e centronan di bario como e punto di reunion pa pueblo.
2. E inversion ta rekeri tambe pa por stimula hobennan cu pa un of otro motibo a stop school pa nan por haya un START-budget pa por caba nan school.
PDP su Plan financiero ta logra 68% di e norma di 6 di e GDP segun Nacionnan Uni riba inversion den educacion.
Na di dos luga, e ta pas den nan plan pa inverti den e sociaal bestaanszekerheid pakket cu lo ta costando pais ariba un total di 248 miyon den e siguiente periodo di gobernacion.
E fondo di desaroyo ta un total di 75 miyon cu PDP kier pusha pa por inverti den e hoben. Sin conta e total di 25 miyon cu lo kier traha conhuntamente cu Qredits pa asina stimula e hoben empresarial cu tin deseo di cuminsa su negoshi.
“Total di e fondo lo ta 100 miyon florin cu nos lo kier inverti den e hoben. E ta importante pa nos realisa cu hobennan studiante ta e futuro di e pilar economico nobo. Esaki kiermen cu nos mester por inverti den e futuro pa crea mas oportunidad.”
Finalmente Figaroa ta bisa cu semper ta tende di hopi persona cu ta opina cu hobennan ta bay den mal caminda, hobennan ta drenta den e mundo di droga y/of bende droga. Pero e circulo vicioso aki por kibr’e si simplemente inverti 100 miyon den un fondo cu lo por yuda miles di hoben studiante pa por brinda nan cu mas oportunidad.
