“E ta tristo pa wak un minister acudi na atakenan personal ora e no por defende su maneho. Yamando otro Parlamentarionan pa halado di coca of cualkier otro insulto ta demostra su arogancia y falta di competencia pa e funcion. Den mi opinion, e minister di finansas di mas malo cu pais Aruba a yega di haya. No solamente ainda nos debe nacional ta riba 5 biyon florin, pero tampoco a demostra madurez politico pa implementa tur locual el a yena su boca cu ne durante e contienda electoral di 2017. Mega debe toch? Wel awe nos tin un GIGA-debe y ainda e ta demostrando ningun solucion pa remedia e situacion. Su vision ta manera e mes a bisa, NUL komma NUL.”
E ariba menciona ta un declaracion duna door di Leonardo Figaroa (PDP). E ta bisa cu mientras cu Minister-President a core firma un acuerdo pa introduci e Rijkswet Aruba financieel toezicht (Raft) ta mustra cu esaki lo no sosode mas den e Gabinete aki, pero lo bira e dolor di cabes pa e siguiente gobierno bay deal cu ne.
Awe riba mesa tin algun proposicion pa cambia e presupuesto pero manera Raad van Advies a hinca den nan conseho di 25 april 2024, gobierno no por splica bon dicon nan ta tuma cierto decision, y den e nota cu nan ta presenta ta ‘schiet te kort’ na por brinda un splicacion cu ta bon sosteni door di argumento y echonan valido.
“Mi a expresa mi posicion na varios ocasion riba e tema di indexering, mi no lo ta e politico mas popular, pero mi ta kere cu indexering aworaki no tabata e momento. Gobierno y Partido MEP prome cu contienda electoral kier purba tira santo den wowo di e empleadonan publico pa asina nan lubida cu 12,6% a wordo reteni di nan durante pandemia y nunca mas lo nan mira e placa aki bin bek.”
Raad ta remarca lo siguiente
Den e aspecto di gastonan e prome aspecto critico ta e echo cu gobierno no ta splica exactamente e reparatietoeslag riba ki periodo exactamente e ta relaciona y con a yega na e sumanan aki pa compensacion di e poder di compra.
Tampoco no ta splica si pa e organonan mas halto di estado y DOW e calculonan ta mesun cos. P’esey ta wordo conseha pa brinda un splicacion amplio riba e calculonan aki. Minister di finanzas ta opta pa bay paga un di tres compania 850 000 florin pa evalua e maneho di credito, dicon un compania mas kico ta e motibo cu mester un compania adicional si ya tin 2 compania cu ta evalua esaki caba.
Cas di cultura lo ricibi 4 miyon florin adicional sin cu esaki a wordo hinca den e presupuesto di 2024, den e caso aki mi ta sostene e ponencia di Raad con gobierno ta priorisa proyectonan pa renobacion, mientras cu e plan di RWZI a wordo neglisha completamente pa awo pasa pa un compania independiente cu ainda no lo cuminsa ricibi fondo, pues gobierno tampoco a opta pa presupuesta fondo pa DOW sigui cu mantencion te ora e compania cuminsa ricibi placa pa por continua e maneho.
No tin splicacion ademas riba e necesidad aworaki pa renoba cas di cultura. Minister Ursell Arends a crea un directiva nobo di maneho di adultonan mayor cu lo ricibi 4,9 miyon florin, segun e Deltaplan Ouderen Aruba (2023-2030). E plan aki ta describi algun meta pero no ta splica con lo haci uzo di e fondo pa realisa e vision aki. No ta clarifica cuanto gasto e roadmap aki lo costa total y con e 4,9 miyon lo contribui pa realisa tur e metanan aki.
Ademas splicando cuanto gasto adicional lo mester haci pa asina realisa tur e metanan aki, sea structural of incidental. Lo bay huur hydrantenan di WEB pa departamento di brandweer cu lo conduci na un adicional 1,1 miyon florin, casi 40% adicional y durante 2023 gobierno a presupuesta no mas cu 1,9 miyon. Pa e motibo aki Raad ta puntra dicon un subida drastico den e fondo presupuesta pa huur di e hydrantenan, kico ta ocasiona e subida drastico aki? E subida aki ta incidental of structural? Y ki otro elemento ta hunga un rol den e redoblacion di e gastonan di brandweer compara cu 2023.
“Mi lo por sigui bay pero papel lo no yega mi y ainda mi no ta den Parlamento, pero pronto cu bo voto mi lo por haci tur e preguntanan aki y mas. Sperando tambe pa por contribui na un cambio berdadero di e rumbo di pais aki. Finalmente, mi por conclui cu e promesa grandi di bon gobernacion y transparencia cu Evelyn Wever-Croes a priminti cada momento den cada conseho ta wordo bari for di mesa, incumplimento, incluyendo e normanan nobo di e ordenansa nacional di control financiero (LAft) y aplicacion di terminonan manera meevallers y schuldreductie a la interpretacion di MEP pero no ley. Sin lubida cu e pronosticonan di
Departamento di Economia tampoco no ta esunnan mas recien uza. Manera semper gobierno nunca por brinda un aplicacion cla y bon sosteni cu cifra y otro echonan controlabel pa fungi como sosten pa nan maneho.”
