Aruba ta drentando un momento crucial. Minister Croes a ricibi aprobacion pa explora petroleo. E maneho desastroso aki di MEP purbando di hustifica cu nos economia lo bay crece ta un mentira di marca mayor. Esaki ta e minister di mas populista y peligroso pa democracia. E decision aki ta hiba ariba den tempo di pica piedra cu consecuencianan y implicacionnan negativo pa e futuro generacion.
Hobennan rond mundo y activistanan manera Greta Thunburg a lanta pa para contra e uzo di materianan prima manera petroleo y gas. Nos tur na school desde prome aña di scol secundario ta haya les riba calentamento global y su implicacion. Como studiante bo ta wordo educa pa reduci, reuza y recicla pasobra si a nos no cuida no planeta no tin un planeta B cu no lo por habita. Na final di dia e Minister concerni su maneho lo ta desastroso pa e futuro di 16 mil hoben y miles di hobennan adulto.
Un vision progresivo riba energia sostenibel
E ta importante pa Parlamento institui un investigacion nacional cu caracter di urgencia riba e maneho di e minister concerni. Despues di varios carta cu PDP a manda pa Parlamento ainda nos ta sinti cu Parlamento completo ta drumi riba un tema asina importante, pero mañan durante e contienda electoral di 2025 (si gobierno no cay prome) lo bay e debatenan y bisa cu nan ta para pa sostenibilidad.
Dicon ainda no a manda yama e minister pa bin responsabilisa su maneho? – Dicon parlamento ta laga minister firma atrobe, manera biaha pasa cu e crisis di Eagle LNG cu lo costa Aruba miyones y ainda nos no a wak ni un pipita di e progreso supuestamente ey.
Pa PDP un vision progresivo kiermen cu nos tin cu tuma decisionnan dificil pero cu lo garantisa un miho porvenir pa e futuro di mañan. Nos ta sostene un vision berde, pero uno realistico unda cu no ta djis haci inversion pa loco, pero sino nos ta acepta cu ainda e ciencia mester wordo desaroya. P’esey e ta crucial pa pidi sosten di reino y Union Europeo pa nos por logra haya e fondonan necesario pa haci e inversionnan pa nos por logra e ciencia necesario.
Un “Aruba Green New deal”
Mundialmente, nos ta wak e ola progresivo pusha pa un green new deal, na Europa y Merca nos ta wak politiconan progresivo ta pusha pa un maneho nobo unda cu nos ta tene cuenta pa crea mas empleonan pa e futuro di e mercado laboral. Pa es motibo aki mes e ta importante cu nos ta cuminsa inverti den un pilar economico. Pa PDP esaki ta stimula y haci uzo di un Crisis ambiental pa converti esaki den un oportunidad economico pa Aruba. Posicionando Aruba como un environmental HUB den e region. Ideanan manera cambia e maneho di ELMAR y introduccion di produccion di alga y inversion den ciencia cu enfoca riba reduccion di sustonan di cada hogar no ta ideanan nobo, simplemente nunca a wordo realisa.
Plan financiero pa PDP
E ta importante pa dentro di e proximo 5 añanan nos por inverti minimo 100 miyon florin den e green new deal aki. Y den e proximo 7 añanan si e BTW no por keda introduci, nos ta mira e necesidad pa introduci un Milieubelasting cu lo por genera un entrada nobo pa inverti den e ciencia asina necesario.
Pa Leonardo Figaroa, y PDP negocia riba un maneho no progresivo riba e tema di Medio Ambiente y Naturalesa ta no negociabel.
