Diamars e sospechoso Eumar Koolman y su casa Marilu Maduro tabata na Landsrecherche, unda a interoga nan. Na salida di Landsrecherche a puntra ambos sospechoso si tin algo di bisa, pero ambos no a duna comentario.
Dialuna Landsrecherche a detene nan den caso di Kwihi, cual tin di haber cu ex-minister Chris Romero. Den luna di november 2023 a detene Eumar Koolman.
A caba di compronde cu casa di e coordinador ta ocupa un funcion halto na hospital y cu durante e interogacion a informa cu nan a suspende di su funcion. Tambe a prohibi su entrada den hospital, pendiente e investigacion penal cu tin contra dje.
E dos personanan aki a pasa henter dia na oficina di Landsrecherche hunto cu nan abogado mientras cu por a compronde, cu diaranson mainta lo sigui cu interogacion.
Kwihi ta un investigacion tocante e acuerdo di servicio (dienstverleningsovereenkomsten) den e periodo entre aña 2017 pa aña 2021. E acuerdo aki tabata cera door di e minister anterior di Transporte, Comunicacion y Sector Primario, Chris Romero, cu varios persona huridico (rechtspersonen). E investigacion aki ta andando desde februari 2023, despues cu e gobierno actual a keha nan ex-colega di no ta integro!
E sospecho ta cu diferente persona, entre nan Koolman y su pareha, a ricibi placa di Pais Aruba na un forma fraudulento via e construccion aki. E investigacion Kwihi ta den full swing. No ta descarta mas detencion. Te ainda no ta conoci, kendenan ta bay wordo hiba dilanti mesa berde tampoco.
Investigacion “Kwihi”
Mucho informacion ainda no tin riba e investigacion mes, pero tur cos lo ta draai rond di Dienst Verlening Overeenkomst (DVO) cu Minister Chris Romero a firma pa su mes, pa su conseheronan y nan famia. Claro, na momento cu Ursell Arends a asumi e funcion di minister y a tuma e ministerio over for di Chris Romero, el a bin topa cu poco sorpresa desagradabel.
Como Minister di Integridad, el a scoge pa haci lo corecto, esta di entrega un keho oficial na Ministerio Publico. Ta menciona cu e contractnan aki, por lo menos algun di nan, ta firma na LVV Santa Rosa, pues no ta algo cu e mandatario lo topa cu ne mesora.
A lanta un Uitzendbureau den Cocolishi
Locual Ministerio Publico ta investiga awor, ta e forma con, aparentemente di forma structura, tabata emplea “spook ambtenaren”, cu de facto no ta presenta ni traha, pero cu ta cobra un suma masha halto na salario. Aparentemente Eumar Koolman tabatin un compania cu tabata presta su mes pa emplea e trahadonan aki cu ta “supose” di traha na e ministerio di ex-minister Chris Romero. Ta menciona cu a hasta emplea yiu di un ex-minister di MEP, cu tambe nan a haci inval na su cas den pasado.
