Diaranson atardi, alrededor di 5:05 pm, doño di un pickup a yega warda di polis di Playa tur na grito. E tabata spanta y a bisa polis cu nan a caba di horta su pickup.
N’e momento ey ta e hefe di districto so tabata na warda. El a dicidi pa su mes sali y atende e persona. A sali na pia y pidi refuerso mesora. Den un rato di tempo, varios patruya a presenta y a cuminsa c’un buskeda p’e pickup.
No a dura mucho cu e polisnan a topa cu e ladron di e pickup. El a purba cuminsa core pa polis, pero no a dura largo. Den Koningstraat a chang’e y deten’e mesora. Den un transporte policial a bay cu ne direccion warda di polis. Un subfiscal lo atende cu su detencion.
