Algo cu sigur hopi di nos na Aruba no lo pensa lo sosode cu nos, aparentemente ta pasando poco poco cada pasa tanto tempo un tiki mas. Esaki ta ladronicia of robo riba caya, unda cu awor nan ta hasta pasa ranca bo telefon for di bo man y core bay manera ta sosode den otro paisnan grandi rond mundo.
Ta asina cu diasabra marduga den careda di 4:25 am, polis a presenta banda di un club nocturno na Tanki Leendert. Akinan por a constata cu pa un motibo of otro un persona a ranca telefon di otro hende y bay cune. Polis a tuma datos di e sucedido y a bisa e persona bay warda entrega un denuncia.
Awendia tin tecnologia instala den e telefon cu por yuda bo haya esaki hopi lihe. No ta conoci si e persona den cuestion lo a bay over despues pa haci esaki, pero sigur lo por ta algo cu por yuda ‘track’ e localidad di e telefon bao cierto circumstancia.
