Pueblo ta basta preocupa pa loke ta e situacion na Venezuela. Randy Paskel, hefe di kustwacht na Aruba a splica cu e situacion di Venezuela tin nan atencion. No por bisa cu cos ta normal. No ta bay crea panico tampoco. Operacionnan di kustwacht ta wordo planea sigur ultimo simannan hopi estrecho cu e partnerdiensten den siguridad di frontera.
Tin cooperacion cu marina real. Tin fragatanan di marina cu ta nabegando den nos area. Tin personal di kazerne tambe ta sostene kustwacht. Tin e cooperacion cu Kustsurveillance di polis. E alerta ta hopi halto na nos costanan pa evita cu cualkier eventualidad por tuma luga, manera yegada di hendenan indocumenta. Transporte ilicito di arma, droga y tur esey, tin den e operacionnan di kustwacht den e ultimo temponan aki.
Reunion
Constantemente kustwacht ta den contacto cu partnernan, entre otro Douane, Imigracion y Warda nos Costa, cu ta bin den e operacionnan aki pa nos por cera nos fronteranan mas miho posibel.
Tin tambe maritiem politie, cu tambe ta sostene kustwacht den henter e trayectoria aki. Tin hendenan cu ta traha hunto cu kustsurveillance riba tera. Tin bista tur caminda. Naturalmente kustwacht tin nan propio unidadnan den aire, entre otro avion y helicopter. Tur eseynan ta yuda den purba di cera e fronteranan.
Fragata
Kustwacht tey constantemente riba lama. Pa loke ta e fragata, ta trahando bao di e bandera di Guarda Costa. Tin tambe Corsou y Boneiro pa protehe. Den e caso aki, ora cu e presion tabata halto na Aruba, e fragata a bin duna asistencia. Den e dianan cu e tabata para afo, e tabata patruyando specificamente pa kustwacht.
Trankilidad
Por tende comentario di hendenan cu tin miedo. Segun Paskel, pueblo por ta trankil cu e dienstennan cu ta na frontera, ta haciendo nan maximo esfuerso pa tene e fronteranan cera. Ta bay tin mester tambe di asistencia di e pueblo mes, si acaso nan mira algo, pa nan notifica polis, notifica Guarda Costa. Number di kustwacht ta 913 y si mira cualkier eventualidad ta tumando luga, pa asina nan por tey y intercepta esaki.
Botonan local
Segun Paskel, constantemente kustwacht ta monitor e botonan local. No ta solamente botonan cu nan ta spera di bin for di pafo di awanan teritorial, ta tene cuenta cu nan. Ta bezig tambe ta monitor tur e actividadnan cu tin riba lama.
Anochi
Kustwacht ta patruya 24/7 den e cooperacion. No por menciona cu ta anochi so nan ta enfoca ariba. En principio nan tey den dia, anochi, tur ora nan ta riba alerta.
Radar
Kustwacht tin diferente radar. Adicional na nan radar cu nan tin, nan tin riba e metalsharknan, nan propio radar y tambe riba panther, unda cu e capacidad pa detecta boto, ta mas efectivo tambe, ora cu tin e botonan den e area.
Satisfecho
Pa loke ta e metalsharknan, nan a yuda masha hopi mes. Kustwacht tabata den un fase di e Super Rhib cu nan a duna bon servicio durante e ultimo 10 añanan. Pero nan tabata birando bieu. Pero ya caba nan tin bon experiencia cu e metalsharknan.
Entrenamento
Kustwacht ta probecha di tur entrenamento. Kustwacht ta constante den operacion. Pero nan ta entrena nan hendenan hunto cu marina. Algun dia pasa, kustwacht tabata tin training cu marina tambe.
Abordo di fragata
Kustwacht por move den tur awa. Ora cu e fragata ta den awanan teritorial di Aruba, ta pone e empleadonan di kustwacht riba e boto pa asina impone autoridad. Ora cu e fragata ta nabega den awanan teritorial, nan tin un team Mericano, cu tin e autoridad den awanan teritorial pa por treed op den casonan cu tin boto pa intercepta.
Relacion di trabao
E relacion di trabao entre e departamentonan manera polis, Aduana etc. ta sumamente importante. Ta importante pa nan keda den comunicacion cu otro. Si tin accionnan ta bay tuma luga, mester palabra y si tin cos no bay bon, mester busca otro na mesa pa sinta y papia riba di loke por mehora y asina sigui bay p’adilanti.
