Den un rueda di prensa di Koningin Wilhelmina Fonds Aruba (KWF) cu a tuma luga awe tardi, a referi na varios topico di importancia pa henter comunidad. Den cuadro di e celebracion di 60 aña di existencia, nan a dicidi di modernisa nan website y a opta pa bay cu e nomber www.kwfaruba.org y lo bay publica informacion mas recien y relevante riba esaki pa e publico por tin acceso na tur informacion necesario.
Riba e website lo tin un seccion di conseho practico, cu informacion riba diferente topico relaciona cu cancer y algun tips di movecion, bida saludabel y tambe con pa preveni y cuida bo mes contra cancer y tambe informacion riba recuperacion di cancer. Fuera di esaki, a inclui nan informacion di cuenta di banco pa posibel donacion:
Caribbean Mercantile Bank
STG Koningin Wilhelmina Fonds
ACC#: 112039705
Tambe por scan e QR code di KWF y asina haci donacion via pay.aw.
Na su turno, presidente di KWF, Lilian Prince a recapitula riba e aña tras di lomba. Ta asina cu aña pasa ni tampoco e aña anterior, e fundacion no por a recolecta fondo debi na e pandemia, pero “cancer si a sigui subi…y e gastonan tambe a keda subi”, segun Prince. No obstante esaki, a traves di henter e periodo aki e fundacion a keda brinda su servicionan n’e pashentnan cu a bin bati na porta.
A gradici e comunidad Arubano cu semper a aporta den transcurso di tur e añanan pa nan por a cubri tur nan gastonan. “E aña aki atrobe nos ta bati porta cerca e comunidad Arubano” pa aporta na e bon causa aki p’asina nan por cubri e gastonan di e pashentnan di cancer. A splica cu aña pasa tabatin un gasto di transporte di 42.175 florin, gasto di asistencia na cas pa pashent terminal tabata di 145 mil florin y na buscamento di producto special, manera bh, aña a pasa a gasta mas o menos 24 mil dollar. Tur esaki sigur ta gastonan halto, pero e fundacion ta sigui haci esaki pa amor pa comunidad. Cada persona cu ta den e directiva, ta boluntario.
Cu esaki den mente, e lunanan di april y mei nan ta subi caya y colecta pa e fundacion y asina ta pidi un aporte di cada un di nos ciudadanonan pa por yuda nan cubri e gastonan necesario aki. Dia 30 di april nan lo ta riba caya y pa luna di mei lo ta dia 7,14, 21 y 28 di mei. Pues, un suplica ta bay na cada ciudadano, si topa cu un boluntario, pone man na curason y tene sigur cu cualkier aporte ta altamente aprecia. A yama danki y alabes a pidi ayudo di un y tur. “Hacie pasobra nunca bo no por sa ta ken ta wordo yuda.”
WEBSITE NOBO
Den cuadro di celebracion di 60 aña di existencia KWF Aruba a dicidi di update nos website y pone mas informacion accesibel pa comunidad. Alabes a cambia e adres di e website pa un nomber mas accesibel pa publico cual a bira www.kwfaruba.org.
Riba e website lo bo haya informacion general di e fundacion. Tambe a pone copia di foyetonan cu mas ta wordo pidi door di publico. E intencion ta pa bai pone mas foyeto y brochure online ya asina ora hende mester di informacion nan por haya esaki facilmente y por print esaki tambe pa nan por lesa den tur trankilidad.
Tin tambe un seccion cu consehonan practico riba diferente tipo di cancer y tips riba un bida saludabel cu suficiente moveshon. Na mes momento por haya informacion over di Wereld Kanker Onderzoeks Fonds cu ta e instancia cu ta haci investigacion riba cancer na Hulanda y cu tin bon cooperacion cu KWF Aruba.
Alabes por haya informacion di e servicionan cu KWF Aruba ta brinda na comunidad cualnan ta entre otro cuido na cas pa pashentnan cu cancer terminal, guia pa damanan cu mester di prothese y tambe por haya BH y transporte pa ora di bai tratamento di cancer na Oncologie, Specialista y radiotheapie.
KWF Aruba no ta haya ningun clase di subsidio y ta depende di e sosten di comunidad pa por sigui eherce su trabounan. Pa e motibo aki ta tene e colecta anual den lunanan di april y mei. Riba e website a añadi informacion di nos cuentanan di banco pa personanan cu lo kier haci donacion. Tin posibilidad tambe pa scan e QR code di Koningin Wilhelmina Fonds pa asina haci donacion via pay.aw.
Por ultimo a pone link cu nos social media cual ta entre otro nos facebook page Koningin Wilhelmina Fonds Aruba pa asina comunidad por keda altanto di tur ultimo desaroyo di e fundacion. E luna aki nos tin nos colecta anual ainda andando y riba nos facebookpage por mira unda e voluntarionan ta para si bo ta riba caminda y kier haci un aporte pa e fundacion por sigui informa y educa comunidad. Pa mas informacion por pasa na nos Centro di Informacion na Spinozastraat 9, net patras di e Watertoren na Oranjestad. Por bel 5820412 tambe pa informacion y por bishita nos website www.kwfaruba.org.
