Diasabra ultimo, Kiwanis Club of Aruba a tene su fiesta anual di gala pa recauda fondo, cu ta sobresali semper p’e ambiente unico y elegancia cu ta combina cu e tema di e anochi.
E aña aki “DUBAI WINE GALA” a surpasa tur espectativa y resulta un bes mas den un exito rotundo unda Renaissance Convention Center a keda comberti den “DUBAI NIGHT” caminda e glamour, elegancia y sofisticacion a keda refleha den e decoracion esplendido realisa pa House of Mosaic Event Planners. Sigur nos por cataloga e ‘wine gala’ di Kiwanis Club of Aruba como un top evento unda cu tur e personanan cu a cumpra un ticket, cu ademas di a contribui pa un bon causa a experiencia un anochi fastuoso.
Un di e highlight di e anochi tabta e motion graphic designer, Egmar Irausquin, cu ta e creative director na Elite, a crea escenarionan di Dubai. Esaki ta e prome biaha cu el a crea un video mapping den Renaissance Convention Center cu a resulta den un impacto inmenso.
Un tent estilo arabe a ser instala tambe unda tabatin varios atraccion manera henna tattoo painting pa Eshita Asrani. Bou e mesun tent lo tin e virtual reality pa otro experiencia mas di Dubai. Mientras cu paden por a disfruta di e atraccionnan bou di e tent, e parti pafo na entrada tabatin e Hookah Lounge unda por a huma tabaco treci special for di Jordania.
Den Renaissance Convention Center e companianan di biña a presenta nan booth decora cu originalidad den e tema y aki por a conta cu presencia di: Arion Wine Company, Divino, Hodgson Trading, Playa Liquor & Bottling Company y Pepia EST. E buffet cu cuminda arabe exkisito prepara pa e chefnan di Renaissance a haya hopi compliment.
Manera tur e fiestanan di Kiwanis Club of Aruba unda e bon musica ta otro highlights, e biaha aki e combinacion musical poderoso tabata den man di ‘N Fuzion, Blue Boulevard y Buleria. DJ Edson Tromp a pone esnan di tur edad goza den style di disco cu efectonan di luz di ELITE Productions. Pa di tres aña Jean Carlo Espinal a fungi como MC, cu su forma unico di trece animacion a pone un ambiente sin igual.
Den e estilo cu Kiwanis Club of Aruba a presenta ‘DUBAI’ a duna esunnan cu a asisti riba e diasabra anochi na e fiesta, e oportunidad pa luci elegancia y estilo cu un toke special den nan vestuario. E premio pa “Best Dressed Couple” a resulta den Lorena Maduro y Addycito Toppenberg. E “door prize” cual tabata un travel voucher balora na AWG 2500 a ser gana pa Judela Chirino.
Kiwanis Club of Aruba ta gradici tur e wine suppliers menciona, tur e otro sponsers y na cada persona cu a cumpra un carchi di entrada pa nan aporte pa asina yuda haci e evento pa recauda fondo uno exitoso e aña aki atrobe.
