Actualmente ya caba e preparacionnan pa Zomercarnaval di e aña aki ta den ful swing. E aña aki pa Zomercarnaval, Kingdoms Under the Sun su tema ta Viva México.
Kingdoms Under the Sun ta bou liderazgo di Rossini van Wijk, cu ta un Carnavalista di curason. El a splica cu e aña aki su grupo ta bin cu e tema México.
Van Wijk a splica cu ora pensa riba México mester pensa riba e diversidad cultural Mexicano, manera Mariachi, Dia de los Muertos, Xochimilco, e hardin flotante cu ta data di tempo di e Imperio Azteca y mucho mas..
P’e grupo, ta un placer semper pa nan pa por pone un fantasia riba caminda. Y nan ta un grupo cu bay rond mundo. Es decir, tur aña nan ta scoge un pais y ta basa nan fantasia di Carnaval riba cultura di e pais aki.
N’e sede di Kingdoms Under the Sun, ta caminda nan ta traha riba e y e bannernan. Pa loke ta e roadpiece, esey ta wordo traha un otro caminda.
Algo remarcabel ta cu, contrario na Aruba, na Hulanda no tin carosa mas. Solamente e reina di carnaval ta haya un carosa, pero tur otro reina ta bay c’un banner.
Den antesala di Zomercarnaval, van Wijk a comenta cu tur fin di siman nan ta bin hunto p’asina sigui cu e preparacionnan pa e evento cultural mas grandi di Hulanda.
Tur fin di siman nan tin bin hunto y pa di e manera aki tambe traha riba tur loke tin mester pa e grupo por subi caya dia 27 di juli proximo.
E grupo tin un luna caba ta preparando y un luna prome cu Carnaval, e lo bira tur dia. Nan ta un grupo di amistad caminda cu cada un di nan ta amantenan di Carnaval, di curason.
