Pa e region di Caribe den Reino Hulandes e partido GroenLinks-PvdA a bira e ganado grandi pa e eleccionnan di Parlamento Europeo. E nativo di Corsou Kenville Kleinmoeding number 18 riba e lista di GroenLinks-PvdA, a bira e candidato cu mas voto.
Na Corsou a registra total 572 voto valido. For di aki 179 a bay pa GroenLinks-PvdA, di cual 87 tawata pa Kleinmoeding. VVD a haya 86 voto, sigui pa D66 (65), y PVV (64).
Na Aruba tin 388 persona cu a vota. Aki tambe GroenLinks-PvdA a resulta di ta e partido mas grandi, cu 114 voto, di cual 30 a bay pa Kleinmoedig. CDA a resulta e di dos partido riba e isla cu 64 voto. D66 y PVV a haya respectivamente 42 y 41 voto.
Na Sint Maarten tin 73 persona a vota, den e caso aki Groenlinks-PvdA y D66 ambos parti a logra 19 voto, VVD y PVV cada uno a haya 7 voto.
Tambe na Boneiro mayoria di e votonan a bay pa Kleinmoedig, asina e gezaghebber interino di Boneiro Reynolds ‘Nolly’ Oleana a duna di conoce dialuna (orario local). Di e 1784 votonan valido, tin 730 a bay pa Groenlinks-PvdA, Kleinmoedig a haya 553.
D66 a resulta e di dos partido, cu 342 voto. Aki tin 259 voto a bay pa secretario di estado pa relacionnan di Reino Alexandra van Huffelen. E di tres partido na Boneiro ta PVV cu a haya 172 voto. Tin 151 persona a vota pa VVD.
Desde 2010 Boneiro hunto cu Saba y Sint Eustatius ta un municipio special di Hulanda.
