Un control rutinario di Douane, cu a tuma luga dia 6 di juni den ora di mainta, riba tereno di compania di transporte di carga ubica na Camacuri. Personal di douane a drenta container como cu tabata preparando esaki pa bay afo cu carga destino Hulanda.
Locual a hala atencion tabata e peculiaridad di e transportacion di ‘hariña’ pa nos madre patria cual ta algo cu no ta comun. Douane a presenta na e area di carga y duna indicacion cu lo bay cuminsa un chekeo riguroso riba e container y su contenido.
Compaña cu su colega K9 a cuminsa rista e container y pa nan sorpresa, e cacho a reacciona riba un of otro carga cu tabata den dicho container. Mesora a tuma contacto cu polis pa asina informa di sospecho di presencia di droga den un container durante nan control.
A mobilisa e departamento concerni, cu a drenta den accion, presenta na e localidad y confisca locual a bira un cargacion grandi di droga cu tabata rumbo Hulanda. Den e container a declara cu lo tabatin un total di 45 bulto di hariña pero despues di un control mas profundo di parti autoridad presente, a bin descubri e contrabanda y preparacion compleho cu realmente a haci pa transporta droga for di nos isla.
Ta trata di un mescla di hariña y cocaina cu a prepara den forma profesional pa evadi descubrimento di e substancia ilicito aki. Tin di bisa cu ta via un test special a bin logra saca afo cu tabatin cocaina presente den e producto (hariña) cu tabata direccion Hulanda.
Segun tin entendi, cu un calculacion haci entre ambos substancia y un separacion di e producto di interes, a determina cu tabata trata di alrededor di 300 kilo di cocaina.
A confisca e cargacion y inmediatamente a cuminsa tur preparacion/ investigacion pa yega na e responsabel di e cargacion di e droga aki. Mirando cu ta trata di un cargamento cu kier a purba transport’e den forma ‘legal’, tur documentacion di e persona aki tabata available na e compania di transporte.
A haci detencion
A drumi riba e sospechoso su movecionnan y no a tarda mucho cu e team di aresto a presenta na pia di trabou y haci detencion. A compronde cu esaki lo a tuma luga un siman despues ( entre 11-19 di juni) cu e hallazgo a tuma luga.
Su detencion tabata inevitabel
A menciona nomber di e sospechoso envolvi den e cargamento aki y tin di bisa cu e no ta un persona desconoci den e mundo di droga. Ta trata di Kendrick Wernet di 38 aña di edad. E persona aki tabata tratando di manda un cargacion basta grandi pa Hulanda pero husticia a pone man riba dje net na tempo.
E ta envolvi den diferente caso di crimen entre otro droga como tambe contrabanda di gasolin.
