Cu grato placer S.V. Bubali Sport Club kier a duna danki na comunidad di Aruba pa e gran asistencia na e prome torneo di Kickball y Kickingball cu Bubali a organisa. Esaki a tuma luga dianan di 09-10-11 di juni 2023 na e tereno di Bubali. Den un bon ambiente y tremendo weganan di kickball y kickingball tur presente a disfruta.
E evento aki tabata organisa pa e promotor Javier Jaspe conhuntamente cu e directiva di Bubali bou guia di e presidente di Bubali, Ryan Figaroa. Aki ta unda e organisadonan kier a duna danki na tur team nan cu a participa y haci di e torneo aki uno exitoso.
Na final di e torneo den kickball mixto ta keda como campeon Just for Fun y como sub-campeon Burache crew. Den kickingball dama a keda como campeon e team di Almas Libres y sub-campeon a keda pa e team di Yoyo’s kick.
S.V. Bubali kier a duna danki na tur cu a yuda pa asina ki tur cos cana bon y cu awe nos por mira atras riba e prome torneo di kickball y kickingball exitoso.
Tambe kier a avisa comunidad di Aruba pa ta pendiente di S.V. Bubali, pasobra tin mas actividad na caminda.
