Dia 4 di maart Departamento di Salud Publico (DVG) hunto cu WHO y Centrale Bureau Statistiek a organisa STEPS 2023. Na 2006 a organisa STEPS caba. Meta di e encuesta aki ta pa haya dato riba kico ta conduci na e factornan di risico di enfermedad no transmisibel.
Jurette Croes, relacionista publico di Departamento di Salud Publico, a splica cu ta prudente pa bolbe organisa esaki p’asina por sa precies e factornan di risico cu ta conduciendo na e enfermedadnan no transmisibel, manera cancer, diabetes, obesidad, presion halto y mas.
Sin haci un encuesta, DVG no sa kico por tin eyfo, kico ta e custumbernan nobo cu por a drenta den sociedad of kico ta e trendnan nobo. P’esey ta haci e encuesta pa por haya e datonan aki, pa por traha mas miho riba plan di prevencion, plan di maneho pa asina den futuro por tin un poblacion mas saludabel.
PROCESO
STEPS ta consisti di tres paso. E prome paso ta un entrevista cu e encuestado, di cual tin binti. A selecciona 5120 cas selecciona y e encuestado ta yega eynan, unda e ta informa e ciudadano cu el a yega eynan pa haci e encuesta di STEPS. Aki ta haci pregunta riba cuanto persona ta biba n’e cas y nan edad. Tur esaki ta hinca den e programa di STEPS. E programa ta selecciona un persona den e cas. E persona aki lo sinta cu e encuestado, unda e lo haya diferente pregunta di salud.
E di dos stap ta midimento di presion, midimento di estatura, peso, cintura y heup pa por identifica e BMI dje persona. Asina aki ta haya sa si e persona ta sobrepeso of no.
E di tres stap ta test di sucu y colesterol. E prome y di dos stap ta haci mesun dia p’e encuestado, pero stap tres mester ta haci na yuna. Croes a indica cu mester haci stap tres mainta trempan y no a come ainda. Por haci esey e dia siguiente of dos dia despues. Pa haci stap tres, e persona mester presenta na DVG, unda antes tabata Landslaboratorium of por bay IBiSA na San Nicolas den e parti di mainta.
Pa mas lesa TREMPAN.COM.
