A keda demostra un biaha mas cu partido MEP ta anti pensionadonan. Pueblo di Aruba siguiendo e reunion di parlamento por a confirma esaki ora MEP Y tambe RAIZ ta vota contra un mocion pa aumento na nos pensionadonan. No ta pornada ora nos lider di Partido di AVP mr. Mike Eman a puntra Presidente di Parlamento mr. Edgard Vrolijk aña pasa pa scucha dolor di nos pensionadonan, cu e presidente di Parlamento a duna como contesta na mr. Mike Eman na un manera sarcastico, pa bisa e pensionadonan pa check bek na aña 2025. Y mi ta kere tambe cu esey mes lo pasa ora Partido AVP drenta gobierno di Aruba y duna e aumento di 50 % na pensionadonan y tambe un aumento substancial na tur esunnan cu salario minimo .E ta no ta un promesa,pero un deber di gobierno.
Den e reunion di parlamento pa aproba pago di indexering na e ambtenaarnan, partido AVP a haci uzo di e oportunidad aki pa presenta un mocion pa por duna tambe un aumento na nos pensionadonan, mirando cu Gobierno mes a gaba cu tin surplus y a haya tambe 500 miyon extra di entrada, danki na tur e medidanan y tambe mirando cuanto miyones ta wordo gasta na biahamento rond di mundo. E ta tristo cu e parlamentarionan di MEP y RAIZ no ta sinti dolor di nos hendenan y esey a wordo bisa tambe door di otro parlamentario di MEP Setty Yarzagaray cu a bisa y ta pensa cu na Aruba no tin pobresa, haciendo caso omiso di CBS su informacion, cu nos pensionadonan ,y por ehempel un pensionado soltero mester di 2500 florin pa luna pa e por sobrevivi. E tristo di esaki ta cu Yarzagaray a labora na CBS y awo ta parce cu e departamento di CBS no tin balor mas pa su persona.
Pensionadonan di Aruba y tambe tur esunnan cu salario minimo, aworaki sigur y cu prueba ,por saca nan conclusion cu Partido MEP cu semper tabata contra pensionadonan,contra tur esunnan di menos recurso,awo tambe tin un Partido mas, cu ta Partido Raiz cu a join tambe MEP den nan Guerra contra tur loke ta na bienestar di pueblo. Ta manera cu nan como hende ta pensa cu nan lo keda jong pa semper y no lo mester di e pension pa biba of kisas nan como gobierno y e parlamentarionan no lo mester di e pension di SVB,door cu nan si lo tin un bon pension di parlamentario y minister y nan lo no mester esun di SVB. Pero e mayoria di pueblo cu si tin e pension di SVB y esunnan tambe cu ta yegando edad pa cobra esaki ,si tin mester di e aumento pa por sigui biba despues di a traha duro pa nos pais. Ta e pensionadonan a pone Aruba na unda cu e ta awo.
Mas tristo ta tambe tur e partidonan chikito den oposicion cu a bandona sala pa no vota mes,demostrando cu partido nan chikito y tambe parlamentarionan independiente manera Gerlien Croes y Rycond do Nascimento, cu nan no tin ningun politica nobo pa ofrece Aruba y no ta presenta tampoco ningun alternativa pa duna alivio na nos pensionadonan. Ta hendenan cu ta mustra di ta ambiciona pa poder y cu te awe no a presenta ningun, pero ningun plan concreto pa un Aruba miho, ta modela constantemente ariba Facebook sin ningun plan nobo pa e pais aki.
Mester puntra nan ta pakico nan kier lanta un Partido politico? Kico ta nan plan pa Aruba? Of ta djis pa sigi goza di e stoel di parlamento pa nan beneficio personal? Pasobra si di awo bo ta contra nos pensionadonan y tur esunnan di menos recurso ta cua lo ta e balor agrega pa lanta un partido nobo?
Ta un partido so tin cu a traha semper y lo bolbe traha pa esunnan di menos recurso y nos pensionadonan, esey ta partido AVP. Aruba ban bolter cos pa un bida miho cu nos tur merece.
