E organisacion di Marlboro Baseball Club ta di luto pa motibo cu nos ex-presidente Jozef Croes a bay sosega den Reino di Dios. Hopi forsa na e familiar di Jozef Croes specialmente na e momentonan aki. Na un edad relativamente hoben Jozef a forma parti di e directiva di Marlboro bou di presidencia di Boei Brion y despues mr. Andresito Bikker, ambos den feliz memoria.
Jozef a bira e president nobo di Marlboro desde 1986 te cu 1999. Un persona hopi stima den e mundo di baseball no solamente pa e hungadonan di Marlboro-Redmachine, pero tambe di e otro organisacionnan. E trabou cu Jozef a haci como president hunto cu su miembronan di directiva Donny Kock, Efraim Bremer, Casildo v/d Biezen, Maiky Rasmijn, Jossy Lacle, Eddy Adonis, John Tromp, Mario Kransen, Otty Olivier y hopi mas tabata grandi.
Bou di su presidencia Marlboro a logra diesun aña straight campeon. Jozef a traha cerca cu e coaching staff di Marlboro Chu, Cai Cai, Richard, Archi, Vio, Casildo y a logra lo siguiente:
· Hiba Marlboro spring training cu Baltimore, Sarasota.
· Gana e Super Copa mas dos torneo na Curaçao.
· Bay dos biaha World Port Tournament na Rotterdam, Hulanda
· Bay Haarlemse Honkbal Week na Hulanda.
· A zorg pa e team a bay Global Championship Millington, TN. USA.
Jozef semper a stimula tur miembro di e organisacion pa duna lo maximo pa e club. Un persona respeta pa tur miembro di e organisacion. Su persona tabata bishita e trainingnan di hubenil, A-klas y AA y tabata duna tur e miembronan debido atencion.
Jozef su lema semper tabata: “Nos exito ta resultado di train duro.” Semper Jozef cu nos miembro honorario Alex Mansur Jr. ta tras di dugout ta apoya e team. Jozef y su bon amigo Elias Kock tur dia ta hunto y comparti cu otro. Marlboro-Red Machine lo haya bo falta Jozef Croes.
Leyenda
Potret 1
Jozef ta ricibi e trofeo di e di 10 campeon sigui for di Boei Brion.
Potret 2
Jozef Croes na World Port Tournament Hulanda.