Diahuebs tabata un dia mas di ANATO 2024 (Asociación Colombiana de Agencias de Viajes y Turismo) na Bogota, un vitrina turistico hopi importante, unda ta showcase Aruba p’asina e operadornan di turismo y tambe agencianan di biahe por tin un miho bista di loke Aruba tin di ofrece. Tin presentacion di varios hotel y entidad turistico di Aruba, cu por a scoge di nan y a suministra hopi informacion entre nan.
Jordan Schlipken-Croes, director di Oficina di Turismo Latino America (ATA), staciona na Bogota a duna di conoce cu “Esaki sigur t’e miho momento pa aumenta e cantidad di stoel pa Aruba. No ta un trabao cu ta bin di ATA, sino cu ta haci hunto cu Aruba Airport Authority, trahando duro den team.”
Avianca a expresa nan mes, dirigi na Aruba, con bon ta trahando cu nan y segun Jordan ta hopi aña di relacion.
Ta 68 aña tin cu AVIANCA ta bulando pa Aruba y por mira e resultadonan aña tras di aña.
AVIANCA t’e partner mas grandi di ATA y t’e aerolinea mas importante pa nan den Latino America. Sin duda e obhetivo ta pa crece y ki miho ta pa crece cu partner cu tin asina hopi aña ta trahando cu nan.
PLANNAN SPECIFICO
Tin varios plan. Segun Jordan, e strategia ta hopi cla. Colombia n’e momentonan aki a yega na un punto cu ta stabilis’e. No crece mucho mas Colombia y cuminsa enfoca riba mercado manera Argentina, Brasil y Chile, cu ta mercado cu ta gasta na Aruba mas ainda compara cu un Colombia.
E direccion ey kier bay. P’esey ta busca suficiente stoel p’e mercadonan aki por bishita Aruba.
Na Aruba tin hopi Colombiano ta biba y nan ta gusta biaha tambe. Tin un rol vice-versa. Segun Jordan, ATA tin e dato specifico ey. Ta 18% di AVIANCA, ta local. Pero di un otro banda, casi 51% di Wingo ta local.
N’e momentonan aki, e Arubiano of e Colombianonan bibando na Aruba ta uzando Wingo mas pa yega Colombia. Pero esey no ta kita cu AVIANCA ta keda como opcion. Awo e vuelo lo bay habri y ta trece mas oferta pa turista yega Aruba y tambe p’e localnan por yega Colombia.
Pa bay bek, poco mas di un aña pasa, tabatin SARPA Airlines cu 50 stoel entre Medellin y Aruba y awo tin 186 cu Wingo y 180 cu AVIANCA. Cinco biaha pa siman cu Wingo y 4 cu AVIANCA. Ta un demanda grandisimo cu a cuminsa hopi chikito.
MERCADO DI PERU
Aña pasa fin di november, cuminsamento di december tabata e vuelo inaugural di Latam cu a bula di Peru pa Aruba. E tempo ey a papia di busca hende fo’i Chile, pasa Peru y bin Aruba.
Segun Jordan, e vuelo aki ta bayendo extremadamente bon y positivo. Pa poco cifra, ta papiando di un loadfactor (con yen e avion ta), ta papia di 80% mas of menos.
Kico ta 80% pa un vuelo cu a caba di cuminsa, ta un cifra hopi positivo. Di unda e mercadonan aki ta bin, ta un gran parti (40%) ta Peruano y 30% ta Chileno, 25% ta Argentina y e resto ta Brasil. Ta un bon mescla cu ta buscando. Di e mercadonan aki ta purbando di crece.
AUMENTO DI VUELO DI LATAM
Manera cu LATAM a anuncia, den seis siman a dicidi cu lo haci di 3 pa 4 frecuencia. Conhuntamente cu haci e trabao bon, no lo ta un sorpresa cu lo tin aumento di vuelo.
ANATO UN EXITO
Den 2023, ANATO tabata un exito grandi. Pa ta un exito asina importante grandi caba, ta pone un presion cu 2024 mester ta miho.
Sigur y sin duda ATA lo haci su esfuerso pa 2024 ta un exito. Nan tin un team importante na Bogota, cu nan lo bay dedica na esaki.
Jordan no lo tin duda cu e lo ta un exito, pero tin varios factor cu mester tene cuenta cu ne. Un cos ta crece, pero otro cos ta mantene. Tin hopi stoel aworaki di Latino America pa Aruba y mester traha duro pa manten’e y crece na mesun momento.
AMOR DI DOS BANDA
AVIANCA, COPA, Wingo, Latam ta trece hende pa Aruba, pero nos hendenan tambe ta subi den nan avion bay diferente destino den Latino America. Esey ta parti di e strategia tambe, pasobra AAA tambe ta yuda grandemente.
E aerolinea no ta pensa solamente den nan vision, y pensa solamente rib’e turista, pero con nan ta yena nan vuelonan.
E localnan tambe ta aporta grandemente n’e resultado positivo di e vuelo. P’esey tambe ta importante pa por educa comunidad di Aruba di con pa yega Aruba, busca miho tarifa. Cada bes ta combersa cu e aerolineanan pa bin cu miho tarifa p’e turistanan, pero tambe p’e localnan por disfruta.
