Pa hopi aña Famia Planea Aruba (FPA) a keda crece den e area di educacion sexual y integral. Si wak bek, ta mira cu practicamente full aña, nan tin diferente workshop cu ta tuma luga y lo traha pa sigui cumpli cu nan meta, segun Jonathan Trinidad, coordinado di Famia Planea Aruba.
Ta importante pa menciona cu e workshopnan aki ta riba diferente nivel di educacion, haciendo cu FPA ta den scolnan special, scol basico, pero tambe MAVO, HAVO, Universidad y e aña cu a pasa, nan tabata na Montesori, na International School of Aruba.
Segun Jonathan Trinidad di FPA , esey ta pa mira con importante educacion sexual integral ta den comunidad.
Si wak bek 2019, e tabata un aña sumamente exitoso cu un crecemento di 57% pa loke ta trata educacion sexual integral, adapta na e necesidad di e scol, pero tambe na e temanan necesario cu tin mara y ancra na e edad y e desaroyo y crecemento di un mucha y/of hoben den su area di salud sexual.
Ora yega na un scol
Trinidad a splica cu awendia e scolnan ta yama of sino FPA tambe ta acerca nan. Asina ey ta brinda of trece dilanti tur e temanan cu ta aden, dicon nan ta importante, e metanan tras di esaki.
Hopi biaha ya caba nan ta dicidi pa programa nan cita, FPA ta bay y por mira vooral e ultimo aña cu a pasa y e otro añanan cu constantemente tin un crecemento pa esaki, unda e scolnan ta birando mas abierto pa FPA por drenta y introduci e temanan manera mester ta.
Ta bon pa por enfoca cu por ehempel un presentacion di klas 1 ta completamente otro y adapta compara cu un mucha cu ta den zesde.
E klas uno por ta lo haya norma, balor, pero tambe partinan di curpa pa e siña e base pa e por conoce su curpa un tiki mas.
Pa ora nan yega zesde, ya nan ta bin cu temanan manera pubertad, cambio di curpa, dicon ta crece y dicon ta cambia. Vooral pa e mucha/hoben durante e añanan por wak cu e ta un desaroyo y cu nos tur ta pasa aden y pa nan sa cu nan no mester tene panico y nan por ta trankil den e area aki, pasobra nan ta creciendo y cambiando.
Etapa como entrada
FPA ta kere primordialmente cu tin cu cuminsa na un edad relativamente hoben. Esey a haci cu na 2019, hunto cu un partnership cu IPA, studiante y docente, a sa di hinca den otro, a base di materialnan cu ta wordo uza local pero tambe internacional, un manual di educacion sexual integral.
Esey a haci cu a mar’e na klas 1 te cu klas 6 den e caso aki, p’asina ey logrando pa na un edad chikito, seis aña, cuminsa cu educacion sexual na un manera no solamente di nivel, pero na un manera mas aansprakelijk pa e mucha.
Cu por yega y drenta na dje y logra e meta cu FPA tabata kier. Esey a haci cu por cumins’e facilmente na un edad hoben, unda cu e ta crea e base y na unda cu FPA ta mira un trapi di crecemento y cu stap pa stap segun e pasonan, nan ta haya les, siñando nan no solamente conoce nan curpa, pero tambe duna nan conocemento, duna nan cualidadnan y logra e meta final, logra un comportacion sexual saludabel.
Pa ora cu yega na e paso pa bula for di zesde pa e hoben mes cu ta na MAVO of HAVO ya caba nan tin un base solido pa asina ey na final di dia nan por tuma decisionnan responsabel pa e edad eynan.Hobennan cu no a haya e base ey, facilmente ora cu FPA drenta den e edad entre 12 y 17, ta duna nan e conocemento aki y finalmente mira un cambio den comportacion sexual.
