E di 51 edicion di Festival di Dande a tuma lugar diabierna anochi den bon ambiente manera semper, cu e biaha aki algun sorpresa chikito tambe.
Reina di Dande a keda den man di Raquel Lampe kende ta un persona cu tin hopi aña ta participa n’e festival di Dande. Hopi biaha Raquel mes a bisa e no ta bin pa gana, mas bien pa engrandece e festival. E Rey di Dande a keda den man di Jonathan Croes kende no ta un hende desconoci tampoco. Pa hopi aña for di jong e ta canta den festival y awe el a bay cu e corona.
Jessica Croes ta conta nos cu e festival di Dande a bay tremendo, nan ta contento y agradecido na tur agrupacion y cantante di Dande cu semper sa di bin haci e evento uno grandi y exitoso. “Un danki na tur persona cu por a yuda nos pa e festival por a bay hopi bon awe.”
Tabata tin un sorpresa chikito pa tur hende unda a dedica y honra e di 51 edicion di Dande, e trayectorio di Harry Croes, tata di Jessica. A haci esaki pa medio di un slide show acompaña pa un storia yegando na celebracion p’e di 51 edicion di e festival tan gusta aki.
E corona tabata un sorpresa grandi pasobra cu aña pasa, Jessica cu su tata a bay busca e coronanan p’e festival di 2022. Na cas di Buchi a sinta den sala combersa. Su tata a bisa Buchi cu pa otro aña e lo kier laga traha e corona di 50 festival di Dande. Door cu Buchi a regala Harry esun di 25 aña tempo cu e festival a cumpli 25 aña.
“Pero lastimamente mi tata no a logra pidi Buchi e corona, y ami tampoco no tabata tin e curashi pa pidi e corona.” Esey tabata e motibo pa kico a haya e sorpresa aki tambe, henter e agrupacion, famianan, amistad y tur hende cu a pone p’e festival aki bira asina grandi.
