Diabierna ultimo dia 28 di februari, ATIA a presenta e resultadonan di e aña anterior y e enfoke pa 2020 y alabes a eligi e miembronan di e hunta di directiva pa aña 2020 – 2021. Den esaki e actual Presidente, esta e conocido abogado mr. Jeannot de Cuba no a pone su mes disponibel mas pa un funcion den e Hunta di Directiva di ATIA, pa cual awo lo mester eligi un Presidente nobo.
Durante 2019, e reforma fiscal tawata un di e temanan cu tawatin hopi atencion di parti ATIA. Recomendacionnan a wordo skirbi y manda, reunionnan y conferencia di prensa a wordo teni y tur tawata parti di e esfuersonan di ATIA pa comunica y purba di influencia decisionnan di gobierno encuanto e reforma fiscal necesario pa bienestar di no solamente comercio pero Aruba su comunidad en general.
Ademas di e tema aki, ATIA tawata envolvi tambe entre otro den temanan laboral por medio di e Dialogo Tripartite Social Laboral, temanan actual manera e problematica di migracion indocumenta, maneho di desperdicio, etc.
Tambe ATIA a sigui enfoca durante e aña riba desaroyo di e habilidadnan y experticio di su miembronan y nan empleadonan por medio di diferente workshops, sesionnan di informacion y eventonan pa engrandece e netwerk di miembronan di ATIA.
Pa aña 2020 – 2021, a reenforsa e hunta di directiva cu un miembro nobo den persona di Jurgen Benschop di Aruba Airport Authority. Lamentablemente, Jeannot de Cuba pa motibonan di trabou, mester a bandona su puesto den hunta di directiva di ATIA. Jeannot de Cuba a fungi como presidente di e hunta durante 2019 – 2020 y ATIA ta gradici de Cuba su aporte valioso durante su aña di presidencia. E presidente nobo, lo wordo eligi durante e prome reunion di e hunta durante e luna di maart.
E hunta di directiva di ATIA pa 2020 – 2021 ta consisti di: Ronnie van Trigt, Tito de Cuba, Tisa LaSorte, Roland Croes, Donald de Veer, Tristan Every, Mattijs Bijen, Frank Snijders, Mireille de Miranda y Jurgen Benschop.
Despues di e parti oficial, Raymond Maxwell a trece un presentacion interesante riba e tema di innovacion y kico e motibonan ta cu hopi biaha innovacion ta fracasa den un organisacion. Esaki por tin di haber cu entre otro e parti di maneho, e cultura di e organisacion pero tambe e incomprension entre diferente generacionnan trahando den un compania. E presentacion a activa un discusion hopi dinamico entre esunnan presente.
E atardi a clausura cu un networking event, caminda e miembronan por a conbersa den un ambiente agradabel.
