Den e weekend di 14 pa 16 di april “Lightning Jaxx Fowler” a participa n’e “Dixieland Nationals” (Atlanta, Georgia),.
Esaki tabata e prome biaha cu Jaxx a participa den e categoria “Intermediate”, unda cu el a keda na di tres luga den e evento principal di diabierna. Riba diasabra Jaxx a logra e di dos luga den e evento principal y diadomingo un biah mas Jaxx ta logra e di tres luga.
Riba e siguiente fin di siman, 21 pa 23 di april, Jaxx a participa n’e “Cajun Nationals” (West Monroe, Louisiana), na unda diabierna el a logra e di dos luga den e evento principal. Riba diasabra el a logra e prome luga den e evento principal y diadomingo un biaha mas, Haxx a logra e prome luga den e evento principal
Siguientemente Jaxx a participa n’e “High Springs BMX Races” (High Springs, Florida) riba e weekend di 28-30 April. Aki Jaxx, siendo henter careda na prome luga den e evento principal, lastimamente a slip cay den e ultimo birada pa e recta final y asina a keda n’e ultimo luga (#8). . E mal estado di tereno tabata debi na yobida. A cancela e siguiente caredanan, ya cu e tempo a empeora (yobida fuerte y lamper). E siguiente dia Jaxx a resulta mas exitoso y a finalisa na un prome luga den e evento principal.
Sigur, un tremendo logro pa un mucha cu a caba di cumpli 5 aña, participando den e categoria “Intermediate” pa prome biaha na Merca. Ta bon pa menciona cu na januari ultimo Jaxx a core den e categoria “Novice” (nobato) pa prome biaha na Merca. Ya despues di despues di tres luna coriendo den e categoria di “Novice” e organisadonan di BMX USA/Canada ta promov’e p’e categoria “Intermediate” (Intermedio).
Tambe ta bon pa menciona cu actualmente Jaxx ta number dos riba e ranking di su edad na Merca.
Finalmente ta desea “Lightning Jaxx” tur clase di exito fin di luna na Nashville (Tennessee) y sigui rindi honor na su pais Aruba.
